Dapi l'onn 2016 sustegna il Departament d'economia publica e fatgs socials las vischnancas grischunas cun in agid d'execuziun tar l'applicaziun e tar la realisaziun da la Lescha davart las abitaziuns secundaras. Questa publicaziun utila è vegnida revedida l'onn 2019 ed è ussa vegnida messa à jour cun decisiuns actualas.

Cun l'agid d'execuziun porscha il Departament d'economia publica e fatgs socials (DES) a las vischnancas ch'èn responsablas per l'execuziun da la Lescha davart las abitaziuns secundaras in sustegn per l'applicaziun e per l'interpretaziun da questa lescha. Il document cuntegna respostas a numerusas dumondas d'applicaziun en la pratica quotidiana da las vischnancas pertutgadas concernent las permissiuns da construcziun.

Plinavant sa drizza l'agid d'execuziun ad interpresas da construcziun, a biros d'architectura e da planisaziun, ad advocatas ed advocats sco er ad ulteriuras persunas interessadas ch'èn medemamain confruntads cun la problematica da las abitaziuns secundaras en il rom dal svilup da projects.

Agid d'execuziun sco recumandaziun
Cumpetentas e responsablas èn e restan las vischnancas che ston observar la lescha e las sentenzias giudizialas pronunziadas en quest connex. Resguardond questas cumpetenzas è l'agid d'execuziun da chapir sco recumandaziun. Cun l'agid d'execuziun actualisà vul il DES furnir ina contribuziun, per ch'il dretg vegnia applitgà en moda uschè unitara sco pussaivel en il chantun.

L'agid d'execuziun stat a disposiziun sin la pagina d'internet dal DES.

Infurmaziuns:

Bruno Maranta, secretari general, Departament d'economia publica e fatgs socials, tel. +41 81 257 23 11, e-mail Bruno.Maranta@dvs.gr.ch

Responsabladad: Departament d'economia publica e fatgs socials