En las suprastanzas communalas dal chantun Grischun importa la quota da dunnas actualmain 21 pertschient, en ils parlaments communals 22 ed en las cumissiuns da gestiun 31 pertschient. Dals 101 presidis èn actualmain 14 en ils mauns da dunnas. A quests resultats vegn ina retschertga actuala.
A chaschun dal giubileum da 50 onns dal dretg da votar da las dunnas sin plaun federal ha il cusseglier guvernativ Christian Rathgeb, schef dal Departament da finanzas e vischnancas, beneventà l'onn passà las presidentas communalas grischunas en uffizi ad in barat. En quest connex ha el incumbensà l'Uffizi da vischnancas (UV) d'eruir sistematicamain la quota da dunnas en las autoritads communalas las pli impurtantas e d'actualisar annualmain questa retschertga. L'emprima retschertga sa basa sin las datas dal di da referenza, il 1. da schaner 2022. La retschertga resguarda las suprastanzas communalas, ils parlaments communals e las cumissiuns da gestiun da las vischnancas politicas. Per pudair demussar il svilup sur in temp pli lung, vegn la retschertga da qua davent actualisada annualmain.
Cleramain sutrepreschentadas en las autoritads
Betg mo en las autoritads chantunalas (Cussegl grond e Regenza) n'è la populaziun feminina actualmain sutrepreschentada cleramain, mabain er en las executivas da las vischnancas politicas. Mo 112 da tut en tut 553 sezs en las suprastanzas vegnan occupads da dunnas. La pli auta quota da dunnas en las suprastanzas communalas ha la regiun Plessur cun ina quota dad exact in quart. En las trais regiuns (Alvra, Bernina, Landquart) na sa chattan naginas dunnas a la testa da las suprastanzas communalas. En la regiun Plessur vegnan duas da las quatter vischnancas manadas da dunnas. Da presidentas communalas disponan actualmain las 14 vischnancas dad Arosa, Panaduz, Cazas, Churwalden, Fideris, Furna, Glion, Masagn, Puntraschigna, San Vittore, Seewis, Segl, Urmagn e Val Müstair.
Per il mument enconuschan 17 vischnancas grischunas in parlament, quai sco cumplettaziun u remplazzament da la radunanza communala. Entant ch'il parlament da la vischnanca da Samignun sa cumpona exclusivamain dad umens, fan part set dunnas dal parlament communal da Tavau che dumbra en tut 17 commembras e commembers. En ils 17 parlaments importa la quota da dunnas en total 22 pertschient. In pau meglier guarda la situaziun ora en las cumissiuns da gestiun cun ina quota da dunnas da 31 pertschient; 102 dunnas èn – dasper 226 umens – activas en ina da questas cumissiuns impurtantas.
Effect d'attracziun tras las elecziuns dal Cussegl grond e da «PROMO Femina»
Il cusseglier guvernativ Christian Rathgeb è persvadì che las elecziuns dal Cussegl grond 2022 vegnan ad avair er in effect che promova las dunnas. «L'engaschament politic da las partidas da pudair preschentar uschè bleras candidatas e candidats per las elecziuns dal parlament chantunal sco pussaivel, dastgass generalmain augmentar la quaida sin in uffizi politic.» Ultra da quai spera il chantun ch'il project «PROMO Femina» ch'el sustegna, vegnia gia bainbaud a purtar fritgs.
Cun «PROMO Femina» vulan la Scola auta spezialisada dal Grischun e tschintg biros d'egualitad chantunals augmentar l'engaschament politic da dunnas sin plaun communal. Uschia pon ins far frunt a la sutrepreschentanza feminina ed ademplir meglier la pretensiun publica per diversitad e per egualitad. Sco ulteriura finamira duai vegnir garantì – cun il sustegn tar l'occupaziun d'uffizis – che las vischnancas funcziunian a lunga vista.
Agiunta:
Represchentanza da las dunnas en suprastanzas communalas dal Grischun 2022
Infurmaziuns:
Responsabladad: Departament da finanzas e vischnancas