Mardi ha gì lieu en il Plantahof a Landquart ina maisa radunda cun represchentanzas da las autoritads per tractar la tematica dal traffic da guntgida per lung da la A13. La Confederaziun, il chantun, las regiuns e las vischnancas vulan s'engaschar per las medemas finamiras ed han discutà propostas da soluziun sco er proxims pass.

La tematica dal traffic da guntgida per lung da la A13 occupa cunzunt las vischnancas da la Tumleastga e da la Val dal Rain da Cuira e na sa ferma betg al cunfin cun il chantun Son Gagl.

Survista da la tematica
A la sesida han las represchentanzas da l'Uffizi federal da vias (UVIAS) e dal chantun orientà las persunas envidadas davart il svilup dal traffic sco er davart las mesiraziuns da las uras ch'igl ha colonnas sin via. Quai er en cumparegliaziun cun auters trajects da via en Svizra. Areguard ils problems da traffic existents tranter Tusaun e Sargans stoi vegnir differenzià tranter l'enviern ed il rest da l'onn. L'enviern resultan ils problems, perquai che las visitadras ed ils visitaders da las destinaziuns turisticas grischunas sa mettan a medem temp sin via vers chasa. Durant il rest da l'onn vegn la situaziun engrevgiada supplementarmain tras il traffic da transit.

Propostas da soluziuns cumplessivas
La tematica da las colonnas sin via sto vegnir considerada en moda cumplessiva. A chaschun da la sesida han perquai tut las represchentanzas pudì preschentar lur punct da vista. Igl è danovamain sa mussà ch'i na dat naginas soluziuns idealas per schliar il problem. Las experientschas praticas mussan ch'i na dat naginas soluziuns senza effects secundars. Ina planisaziun accurata ed ina coordinaziun cumplessiva da las mesiras è perquai indispensabla. Eventualas propostas da soluziuns ston vegnir tschertgadas sin trais plauns:

• mantegnair la circulaziun dal traffic sin l'autostrada
• evitar / reducir il traffic da guntgida
• reducir las consequenzas dal traffic da guntgida

Mesiras pussaivlas èn d'augmentar l'infurmaziun da las participantas e dals participants dal traffic, d'endrizzar stabiliments per avertir da privels e per armonisar la sveltezza, da dosar las entradas e las sortidas, d'augmentar la supportabilitad da las vias da transit tras ils vitgs e da meglierar las purschidas dal traffic public. Pussaivlas èn er mesiras architectonicas.

Program d'aglomeraziun
En il rom dal Program d'aglomeraziun Cuira da la quarta generaziun – ch'è vegnì elavurà en cooperaziun cun las regiuns e cun las vischnancas – èn gia vegnidas definidas differentas mesiras. Uschia èn vegnidas formuladas 7 mesiras areguard la coordinaziun, l'abitadi ed il traffic, 3 mesiras en il sectur dal management da la mobilitad e da las plazzas da parcar sco er 11 concepts da gestiun e da furmaziun per meglierar l'andament dal traffic sin las vias da transit tras ils vitgs, uschia ch'el è pli cumpatibel cun ils abitadis. Il traffic duai vegnir dirigì a vista mesauna cun agid d'in concept per la gestiun dal traffic che vegn anc precisà en il rom d'in studi preliminar. Ina gruppa da lavur dal chantun cumenza proximamain cun las lavurs respectivas.

Emprima mesira
Sco mesira a curta vista – ed en il rom d'ina emprova da pilot – vegn la via da transit tras las vischnancas da Panaduz e da Razén dada liber sur Pasca mo a las abitantas ed als abitants, als servetschs d'apport sco er al traffic public. Questa emprova duai dar infurmaziuns per eventualas mesiras futuras.

Per las regiuns e per las vischnancas participadas sco er per las represchentanzas da las autoritads chantunalas e federalas èsi cler che la tematica po vegnir schliada mo cuminaivlamain e mo sin plaun surregiunal. Tut las parts participadas vegnan a persequitar ed a coordinar propostas da soluziuns en lur sectur. In aspect central è che tuttas e tuts pon gidar cun l'agen cumportament a diminuir ils problems da traffic.

Infurmaziuns:

Dumondas da las medias vegnan coordinadas dal Post da medias da la Polizia chantunala dal Grischun, tel. +41 81 257 79 50, e-mail info@kapo.gr.ch

Responsabladad: Departament da giustia, segirezza e sanadad / Departament d'infrastructura, energia e mobilitad