La Cumissiun per giustia e segirezza (CGS) dal Cussegl grond ha investigà – sin basa d'ina denunzia penala cunter dus derschaders chantunals en uffizi e cunter in anteriur president da la Dretgira chantunala – sch'i dastgia vegnir fatg ina inquisiziun penala cunter questas persunas. La CGS n'ha chattà nagins indizis, per in cumportament chastiabel dals trais derschaders, che giustifitgassan in tal proceder.

Il zercladur 2021 ha in advocat da San Murezzan inoltrà ina denunzia penala cunter dus derschaders chantunals en uffizi e cunter in anteriur president da la Dretgira chantunala pervia da favurisaziun. Perquai ch'il Dretg grischun prevesa, ch'i dastga vegnir investigà penalmain cunter derschadras e derschaders da la Dretgira chantunala e da la Dretgira administrativa pervia da crims e pervia da delicts commess en uffizi mo cun l'autorisaziun da la Cumissiun dal Cussegl grond ch'è cumpetenta per la giustia, è la denunzia penala da l'advocat arrivada tar la CGS per far in'uschenumnada procedura d'autorisaziun. Pervia da l'attenziun da las medias per questa fatschenta, vegn la decisiun da la CGS communitgada publicamain.

Chattà nagins indizis per in cumportament chastiabel
La CGS è s'occupada detagliadamain dals fatgs che furman la basa per la denunzia penala cunter ils trais magistrats. Ella ha examinà, sch'i dat indizis u suspects per ina favurisaziun commessa en uffizi, che giustifitgassan investigaziuns penalas.  

La Cumissiun è arrivada a la conclusiun, ch'i na dat nagins suspects e ch'ils derschaders denunziads èn sa cumportads en confurmitad giuridica. En ina decisiun ch'ella ha prendì unanimamain n'ha la CGS pia betg concedì l'autorisaziun per la persecuziun penala dals dus derschaders chantunals e da l'anteriur president da la Dretgira chantunala. 

Infurmaziuns:

president da la cumissiun Gian Derungs, tel. +41 79 641 30 72

Responsabladad: Cumissiun per giustia e segirezza