Dapi l'avrigl 2022 èn vegnidas valitadas l'impronta ecologica e la persistenza da var 2400 products regiunals certifitgads che derivan dals chantuns Grischun, Uri, Glaruna e Tessin. En collavuraziun cun Beelong introducescha alpinavera l'uschenumnà eco-score: ina indicaziun che valitescha, tge effect che las victualias han sin l'ambient e quant persistentas ch'ellas èn.

Alpinavera è ina plattafurma da marketing e da communicaziun che s'engascha dapi plirs onns per ina producziun persistenta e per in consum persistent. Ella è ultra da quai ina da quatter organisaziuns surregiunalas che vegnan sustegnidas da la Confederaziun e dal chantun e che promovan la vendita da products regiunals. Actualmain èn 2400 products regiunals dad alpinavera certifitgads sco tals e portan il sigil da qualitad «regio.garantie». Per render visibla questa producziun da victualias favuraivla al clima ha alpinavera laschà valitar tut ses products regiunals en collavuraziun cun Beelong. Ussa è cuntanschì l'emprim term impurtant: Tut ils products regiunals d'alpinavera ch'èn certifitgads survegnan in eco-score – ina valitaziun individuala da l'impronta ecologica e da la persistenza.

Mesirar ed inditgar la persistenza da las victualias
L'onn 2019 ha alpinavera examinà differents indicaturs da l'ambient ed è sa decidida per il eco-score da Beelong. Quai per trais motivs: Beelong è vegnì fundà l'onn 2008 ed è pia l'organisaziun cun l'experientscha la pli lunga e la pli gronda en la valitaziun da products sco er da la gastronomia. Plinavant dispona Beelong d'ina gronda rait en Svizra. Mintga ingredienza d'ina victualia vegn examinada e resumada a la fin ad in resultat total. Quest eco-score vegn lura preschentà sin il product en furma d'ina ampla cun ina scala dad A fin E – da verd fin cotschen.

Per ch'ina valitaziun saja pussaivla, dovri indicaziuns detagliadas davart ils products. A questa sfida han ins fatg frunt gia baud, e cun la cooperaziun da las producentas e dals producents affiliads han ins stgaffì ina fitg buna situaziun da partenza.

Products regiunals – emprima schelta
Victualias che na vegnan betg mo producidas en la regiun, mabain che vegnan er vendidas là, èn en moda. Ultra da quai s'interessan las consumentas ed ils consuments er pli e pli per la dumonda, quant persistents ch'ils products regiunals èn. Perquai èsi fitg impurtant per alpinavera da mussar ch'ils products regiunals certifitgads, che derivan dals chantuns Grischun, Uri, Glaruna e Tessin, n'èn betg mo regiunals, mabain contribueschan er ad in nutriment favuraivel al clima. Cun il eco-score vegn introducida ina indicaziun visuala che facilitescha la decisiun da cumprar il product.

Tgi che preferescha in nutriment favuraivel al clima, ha raschun da cumprar products stagiunals e regiunals. Las valitaziuns dals products regiunals certifitgads èn tut en tut fitg positivas e la gronda part dals products survegn in eco-score en il sectur verd tranter A e B. Dals 1066 products che derivan dal chantun Grischun èn mo 25 vegnids valitads cun C+ ed in sulet product ha survegnì in C. Cun las producentas ed ils producents pertutgads vegni guardà, quant enavant ch'ina meglieraziun è pussaivla. Per ils resultats positivs datti plirs motivs: Grazia a lur derivanza èn ils products regiunals cleramain en avantatg, perquai che las directivas premettan er la creaziun da valurs e pia l'elavuraziun en la regiun respectiva, uschia che la rauba sto far mo curts viadis. Plinavant han ils auts standards da cultivaziun e da producziun effects fitg favuraivels cunzunt en il Grischun sco chantun biologic.

Tras l'introducziun dal eco-score cuntanscha alpinavera ina finamira intermediara. Ils products valitads vegnan preschentads en ils profils da las producentas e dals producents dad alpinavera.ch ed en la butia online. Là èn er accessibels tut ils lieus da vendita da las partenarias e dals partenaris d'alpinavera.

Infurmaziuns:

• Daniel Buschauer, manader da l'Uffizi d'agricultura e da geoinfurmaziun, tel. +41 81 257 24 31, e‑mail Daniel.Buschauer@alg.gr.ch
• Jasmine Said Bucher, manadra da fatschenta da l'uniun purtadra alpinavera, tel. +41 81 254 18 50 / +41 79 754 77 73, e‑mail info@alpinavera.ch

Responsabladad: Uffizi d'agricultura e da geoinfurmaziun