L'avrigl ha il chantun Grischun registrà 1415 persunas dischoccupadas. Quai correspunda ad ina quota da dischoccupaziun da 1,3 pertschient. Envers il mais precedent cun 1094 persunas dischoccupadas è il dumber da persunas dischoccupadas creschì per 321. Ultra da quai èn vegnidas registradas 935 persunas che tschertgan ina plazza che n'èn betg dischoccupadas.

Tar las persunas che tschertgan ina plazza che n'èn betg dischoccupadas appartegnan las persunas che sa participeschan a mesiras da furmaziun supplementara e d'occupaziun u che obtegnan in gudogn intermediar sco er las persunas che fan mo diever dals servetschs d'intermediaziun dals centers regiunals d'intermediaziun da lavur (CIL).

Sch'ins adescha il dumber da las persunas dischoccupadas cun quel da las persunas che tschertgan ina plazza che n'èn betg dischoccupadas, resulta il dumber da las persunas che tschertgan ina plazza. L'avrigl èn vegnidas registradas 2350 persunas che tschertgan ina plazza. Envers il mais precedent è quest dumber creschì per 47.

La statistica detagliada dal martgà da lavur chattais Vus sin la pagina d'internet da l'uffizi per industria, mastergn e lavur.

Ils servetschs da l'intermediaziun da lavur – declerà cun simpels pleds
En sias stentas permanentas da sustegnair optimalmain las persunas che tschertgan ina plazza en il chantun Grischun ha l'Uffizi per industria, mastergn e lavur creà – en collavuraziun cun la Chanzlia chantunala – in video davart il tema «mesiras per il martgà da lavur» sco er ina retscha da videos curts davart las singulas mesiras. Cun lur agid duai vegnir facilità l'access als servetschs da l'intermediaziun da lavur e vegnir scursanida la via enavos sin il martgà da lavur.