La Regenza ha relaschà l'Ordinaziun tar la Lescha chantunala davart mesiras per interpresas en cas da direzza en connex cun l'epidemia da COVID-19 durant l'onn 2022. La lescha chantunala che furma la basa per questa ordinaziun, è vegnida tractada en il Cussegl grond gia durant la sessiun d'avrigl 2022 e deliberada cun 107 cunter 0 vuschs e cun 0 abstenziuns. Dumondas per quests novs agids per cas da direzza pon vegnir inoltradas proximamain.

Il favrer 2022 ha la Confederaziun deliberà ina nova ordinaziun che permetta da pajar novs agids per cas da direzza ad interpresas ch'èn anc restrenschidas fermamain pervia da l'epidemia da COVID-19 er anc durant l'onn 2022.

Ussa ha il chantun Grischun stgaffì las basas e las premissas legalas per pudair sustegnair interpresas grischunas er durant l'onn 2022. Sco cas da direzza valan interpresas che han subì gia durant ils onns 2020 e 2021 ina reducziun da la svieuta da passa 40 pertschient ubain che han l'onn 2021 stuì serrar durant 40 dis e che na pon anc adina betg cuvrir lur custs cun lur svieuta.

Questas interpresas pon dumandar in sustegn per ils mais schaner fin mars 2022, sch'ellas cumprovan custs betg cuvrids per questa perioda.

Dumondas pon vegnir inoltradas ils proxims dis
DIls proxims dis vegn il Departament d'economia publica e fatgs socials a publitgar ses formular da dumonda sin sia pagina d'internet. Las interpresas cun sedia en il Grischun che adempleschan ils criteris dal cas da direzza, pon inoltrar ina dumonda da sustegn fin il pli tard ils 15 da fanadur 2022. Dumondas inoltradas memia tard na vegnan betg resguardadas.

Tut las infurmaziuns impurtantas davart las premissas per inoltrar la dumonda sco er davart las basas da calculaziun stattan a disposiziun a partir dals 16 da matg 2022 sin la pagina d'internet dal Departament d'economia publica e fatgs socials.

Infurmaziuns:

Responsabladad: Departament d'economia publica e fatgs socials