Cun in «management da mobilitad manaschial» fa la Regenza frunt a la svapur da CO2 che vegn chaschunada da l'administraziun chantunala en il sectur dal traffic, quai cun agid da differentas mesiras che schanegian l'ambient e che augmentan l'effizienza. En Svizra vegnan chaschunadas var 30 pertschient da las emissiuns da CO2 dal traffic. Las mesiras da reducziun per cuntanscher las finamiras dal clima èn perquai spezialmain empermettentas en quest sectur.

En connex cun la tematica da la persistenza surpiglia il chantun la funcziun d'in exempel. Ils ultims onns ha il chantun prendì differentas mesiras per concepir ina moda d'agir da l'administraziun chantunala, che spargna pli fitg las resursas. Questas mesiras cumpiglian: meglierar l'effizienza energetica e remplazzar purtaders d'energia fossila en las immobiglias dal chantun sco er reducir cuntinuadamain, sco cumenzà l'onn 2018, il consum da carburants e las emissiuns dal parc da vehichels chantunal. Il chantun ha la finamira da diminuir la svapur da CO2 dals autos da persunas che vegnan duvrads en l'administraziun chantunala fin l'onn 2028 sin almain la mesadad da la svapur da l'onn 2017.

Introducziun d'in «management da mobilitad manaschial»
En il senn da questa finamira ha la Regenza l'intenziun da reorganisar la mobilitad da l'administraziun chantunala. Per quest intent ha ella concludì d'introducir in uschenumnà «management da mobilitad manaschial» (MMM). Cun il MMM ademplescha ella la finamira strategica da prestar ina contribuziun a favur d'ina execuziun uschè persistenta ed ecologica sco pussaivel dal traffic da servetsch e dal traffic dal viadi a la lavur ed uschia da sustegnair la protecziun dal clima. Il MMM metta ils accents sin promover ina utilisaziun pli intensiva da furmas da mobilitad favuraivlas al clima e da servetschs dal diever cuminaivel d'in vehichel, sin stgaffir in management central dal parc da vehichels sco er sin reorganisar l'administraziun da las plazzas da parcar.

Per reducir a vista mesauna il parc da vehichels dal chantun vegn surdada da nov a l'Uffizi da construcziun bassa, sco manager central dal parc da vehichels, la responsabladad integrala per l'acquisiziun e per il mantegniment e l'administraziun dals vehichels da servetsch chantunals. Exceptada da quai è la Polizia chantunala che resta vinavant responsabla sezza per ses parc da vehichels. Cumbinà cun questas mesiras duai l'utilisaziun favurisada da purschidas dal diever cuminaivel d'in auto e da purschidas dal traffic public en il traffic da servetsch e dal viadi a la lavur render la mobilitad da l'administraziun chantunala pli ecologica.

La Regenza parta dal fatg, che las mesiras MMM vegnian tut en tut a chaschunar ina reducziun dals custs da la mobilitad da l'administraziun chantunala.

In management da mobilitad è d'avantatg er per interpresas privatas
L'introducziun d'in MMM sa paja er per interpresas privatas. Ultra dals avantatgs economics sin basa da l'augment da l'effizienza, han las stentas che vegnan fatgas a favur da la persistenza, cumprovadamain in effect positiv en la percepziun publica da las interpresas sco er da las collavuraturas e dals collavuraturs. Ina concepziun intelligenta dal traffic en il rom d'in MMM gida plinavant decisivamain – sco ch'igl è urgentamain necessari – a decarbonisar la mobilitad ed a distgargiar il traffic.

Las interpresas duain vegnir sustegnidas finanzialmain, sch'ellas introduceschan in MMM. Quai prevesa il Plan d'acziun «Green Deal per il Grischun» ch'è vegnì discutà dacurt en il parlament, sco ina da pliras mesiras da promoziun per cuntanscher las finamiras dal clima en il sectur industrial. Las basas legalas correspundentas èn en elavuraziun. Per il sectur privat s'empermetta il chantun tras quai in impuls da renunziar al traffic individual motorisà e d'utilisar dapli models dal diever cuminaivel d'in vehichel.

Infurmaziuns:

Responsabladad: Regenza