La Regenza ha deliberà il sboz d'ina Lescha davart il e-government per la consultaziun. La lescha stgaffescha las basas giuridicas per la digitalisaziun da process administrativs e per la correspundenza giuridica electronica en proceduras administrativas.
Da pudair liquidar fatschentas administrativas cun las autoritads en moda segira sin via electronica correspunda ad in grond basegn da la populaziun e da las interpresas. Per far avanzar la furniziun da prestaziuns digitalas en il chantun ha la Regenza deliberà la stad 2018 la Strategia dad e-government dal chantun Grischun per ils onns 2019-2023. Il project legislativ qua avant maun creescha las basas giuridicas ch'èn necessarias per realisar la strategia e la digitalisaziun cumplessiva da l'administraziun.
Portal dad e-government per servetschs administrativs digitals
Servetschs administrativs digitals duain esser applitgabels per la populaziun e per las interpresas en moda simpla, segira e senza barrieras. Per quest intent duai en emprima lingia vegnir mess a disposiziun in portal chantunal dad e-government. La Lescha davart il e-government regla l'organisaziun, il manaschi e l'utilisaziun da quest portal dad e-government. Sur quest portal pon vegnir utilisads servetschs administrativs electronics dal chantun en moda centrala e cun las medemas datas d'access. Sut tschertas premissas vegnan vischnancas, regiuns ed auters purtaders d'incumbensas publicas medemamain a pudair utilisar il portal dad e-government per porscher lur atgnas prestaziuns a la populaziun ed a las interpresas. Ils servetschs administrativs stattan dentant vinavant a disposiziun sin via betg electronica.
Pussibilitar la correspundenza giuridica electronica
En proceduras administrativas èsi oz savens necessari da suttascriver a maun inoltraziuns u disposiziuns. Ina communicaziun cumplettamain electronica cun las autoritads n'è pia betg pussaivla sin fundament da las basas giuridicas vertentas. La revisiun parziala previsa da la Lescha davart la giurisdicziun administrativa duai pussibilitar en il futur – en tut las proceduras administrativas – da far inoltraziuns e da communitgar disposiziuns sin via electronica. Tras l'utilisaziun da sistems da transmissiun (sco p.ex. il portal chantunal dad e-government) duai vegnir remplazzada la suttascripziun a maun e garantida l'identitad da las utilisadras e dals utilisaders sco er l'integritad dals documents da medema moda e maniera sco tar l'inoltraziun per posta.
Ils documents da consultaziun pon ussa vegnir consultads
La consultaziun dura dals 15 d'avust 2022 fin ils 13 da november 2022. Ils documents pon vegnir consultads sin la pagina d'internet dal chantun Grischun. Ultra da quai pon els vegnir empustads per telefon (tel. +41 81 257 25 16) tar il Departament da giustia, segirezza e sanadad.
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch (cuntanschibel da las 13.30 fin las 14.30)
Responsabladad: Regenza