La Regenza ha garantì ina contribuziun chantunala da maximalmain 31 500 francs a la cuminanza da lavur Academia Engiadina SA e Somedia Learning SA per il project «Online-Academy per la branscha turistica». Ella ha deliberà la contribuziun en il rom da la Lescha davart la promoziun da la transfurmaziun digitala en il Grischun. L'entir project è budgetà cun 63 000 francs ed è concepì per ina perioda da 6 onns.

Cun l'academia online per la branscha turistica duain las collavuraturas ed ils collavuraturs, las possessuras ed ils possessurs resp. las manadras ed ils manaders d'interpresas turisticas pli pitschnas e mesaunas (IPM) e d'interpresas datiers dal turissem en il chantun Grischun vegnir qualifitgads da promover lur atgna transfurmaziun digitala. La purschida sa drizza en emprima lingia a la hotellaria, a la gastronomia, als purschiders d'events ed ad auters furniturs da prestaziuns turisticas, ma er a l'agricultura sco er a commerziantas e commerziants che vulan vender lur agens products locals. L'element central da questa plattafurma da furmaziun supplementara è ina purschida dad 80 medias autodidacticas digitalas. La finamira è quella da render accessibla la purschida gratuitamain a las utilisadras ed als utilisaders che sa participeschan a l'academia.

Ulteriuras infurmaziuns: https://grdigital.digital/

© Fabian Gattlen

La Regenza ha prendì enconuschientscha dal rapport «Evaluaziun dal management da crisas dal chantun Grischun» da la SPF Turitg (Center for Security Studies, CSS). Ultra da quai ha ella incumbensà ils uffizis chantunals d'elavurar in plan cumplessiv per realisar las mesiras che vegnan recumandadas ed inditgadas en il rapport.

Il rapport da la SPF Turitg è il resultat d'ina vasta examinaziun da l'organisaziun e dals process dal Stab directiv chantunal (SDC). Anc mai n'è il SDC stà en acziun durant in temp uschè lung, sco en il rom dal cumbat cunter la pandemia dal coronavirus. Questa intervenziun ordvart lunga ha permess d'examinar, quant enavant che l'organisaziun actuala dal SDC ed ils process usitads sa cumprovan e nua ch'i dat eventualmain in basegn d'adattaziun. Per quest intent ha la Regenza incumbensà l'Uffizi da militar e da protecziun civila (UMPC) la stad 2020 da far in'analisa posteriura cumplessiva. Per l'evaluaziun externa ha il UMPC collavurà cun il Center for Security Studies (CSS), sco center da cumpetenzas da la SPF Turitg. Pervia da la durada da la pandemia è il rapport vegnì terminà pir il terz quartal 2022 – suenter l'aboliziun da la situaziun speziala l'avrigl 2022.