Il Tribunal federal ha declerà ch'ina clausula per cas da direzza, ch'era vegnida introducida da nov en la Lescha da taglia dal chantun Tessin per la valur da l'atgna locaziun, cuntrafetschia a la constituziun. La sentenzia ha er consequenzas per la clausula per cas da direzza dal chantun Grischun. Perquai ha la Regenza adattà la clausula.

La valur da l'atgna locaziun è suttamessa a la taglia sin las entradas. En cas, nua che las entradas da la valur da l'atgna locaziun èn fitg autas en relaziun cun las entradas en daners, po il pajament da la taglia sin las entradas chaschunar difficultads da liquiditad, perquai ch'ils meds finanzials mancan. Per quest motiv ha la Regenza introducì avant 15 onns ina clausula per cas da direzza. Quella prevesa che la valur da l'atgna locaziun ch'è suttamessa a la taglia, dastga importar maximalmain 30 pertschient da las entradas en daners, sche la facultad suttamessa a la taglia importa main che 600 000 francs. Da questa clausula per cas da direzza èn pertutgadas cunzunt persunas pensiunadas.

Il chantun Tessin aveva copià la clausula grischuna per cas da direzza ed integrà tala en la Lescha chantunala da taglia. Avant paucas emnas ha il Tribunal federal approvà in recurs cunter questa disposiziun ed ha annullà la clausula tessinaisa per cas da direzza. Il Tribunal federal n'ha betg refusà en general ina clausula per cas da direzza. El ha dentant menziunà che la valur da l'atgna locaziun stoppia importar – en mintga cas singul – almain 60 pertschient da la valur da locaziun dal martgà. Quests 60 pertschient furmian la limita minimala da quai che saja anc cumpatibel cun il princip da l'egualitad giuridica tranter proprietarias e proprietaris d'ina vart e locatarias e locataris da l'autra vart.

Consequenzas per il chantun Grischun
Suenter che l'Administraziun da taglia ha analisà la sentenzia dal Tribunal federal concernent il chantun Tessin, ha la Regenza decidì da cumplettar la clausula per cas da direzza cun ina resalva. Tenor quella sto la valur da l'atgna locaziun adina importar almain 60 pertschient da la valur da locaziun dal martgà. Uschia vegni tegnì quint tant da la voluntad politica oriunda sco er da la sentenzia dal Tribunal federal concernent il chantun Tessin.

A partir dal 1. da schaner 2024 vegnan applitgads ina nova software per la decleraziun da taglia ed in nov program electronic da taxaziun. La Regenza vegn perquai a metter en vigur la resalva per il 1. da schaner 2024.

Infurmaziuns:

• Cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e‑mail Christian.Rathgeb@dfg.gr.ch 
• Dr. iur. Toni Hess, manader dal Servetsch giuridic da l'Administraziun da taglia, tel. +41 81 257 33 26, e‑mail Toni.Hess@stv.gr.ch

Responsabladad: Regenza