L'administraziun chantunala dal Grischun cumenza il project da pilot «Innovationboard». La finamira dal project èsi d'augmentar en l'avegnir l'attractivitad da l'administraziun chantunala sco patruna cun l'integraziun da collavuraturas giuvnas e collavuraturs giuvens.

Il mund da lavur actual sa mida en moda rasanta e permanenta. Pliras analisas cumprovan che la mancanza da persunal e da persunas spezialisadas pudess tutgar fermamain il Grischun ils proxims onns. Da quai resultan sfidas actualas che vegnan a s'intensivar vinavant en il futur. Dapi il cumenzament da la pandemia dal coronavirus èn per exempel s'augmentads ils basegns da las collavuraturas e dals collavuraturs da concepir lur lavur en moda flexibla, quai vul dir independentamain dal lieu e dal temp. Plinavant daventan temas sco la transfurmaziun digitala, l'inclusiun e la diversitad pli e pli impurtants. Sche patrunas e patruns vulan restar attractivs per lur collavuraturas e collavuraturs, ston ellas ed els demussar flexibilitad e s'adattar cuntinuadamain a las pretensiuns che sa midan.

Promover ideas innovativas e creativas
Per s'occupar da questas sfidas, lantscha il chantun Grischun en il rom dal Program da la Regenza il project da pilot «Innovationboard». La finamira da quest project da pilot èsi da dar la pussaivladad a collavuraturas giuvnas e collavuraturs giuvens da gidar a concepir l'administraziun chantunala da damaun e d'augmentar l'attractivitad da l'administraziun chantunala sco patruna cun ideas innovativas. Il «Innovationboard» duai uschia prestar ina contribuziun impurtanta per far frunt a la mancanza da persunas spezialisadas. Quest project è vegnì inspirà tras l'iniziativa «Talent Board» da la Banca Chantunala Grischuna. Set collavuraturas e collavuraturs dals posts da servetsch intermediars Uffizi da construcziun auta, Uffizi d'informatica ed Uffizi da persunal sa participeschan al project da pilot chantunal. Fin la fin da l'onn vegnan ellas ed els ad elavurar ed approfundar emprims accents d'acziun e propostas da realisaziun pussaivlas. Sco blocs tematics surordinads èn vegnidas eruidas l'attractivitad da l'administraziun chantunala sco patruna sco er la persistenza e la diversitad. Suenter la fasa da pilot e suenter l'evaluaziun dal project duai il «Innovationboard» vegnir instituziunalisà ed engrondì cun ulteriuras collavuraturas giuvnas ed ulteriurs collavuraturs giuvens da l'administraziun chantunala.

Infurmaziuns:

• Cusseglier guvernativ dr. Christian Rathgeb, schef dal Departament da finanzas e vischnancas dal Grischun, tel. +41 81 257 32 01, e-mail Christian.Rathgeb@dfg.gr.ch
• Gino Clavuot, responsabel per BCM e manader dal project «Innovationboard», Uffizi da persunal, tel. +41 81 257 89 95 (cuntanschibel a partir da las 9.00), e-mail Gino.Clavuot@pa.gr.ch

Responsabladad: Departament da finanzas e vischnancas