Persunas che tgiran lur confamigliars en il chantun Grischun duain survegnir en l'avegnir in supplement da tgira per lur lavur. La Regenza ha l'intenziun da metter a disposiziun a partir da l'onn 2025 mintga onn var 2,4 milliuns francs per quest intent. Il Departament da giustia, segirezza e sanadad vegn incumbensà d'elavurar il project da lescha en chaussa.
Las persunas che tgiran lur confamigliars èn ina pitga impurtanta dal provediment da la sanadad. Ellas cumpletteschan las purschidas da tgira instituziunalisadas. E cun lur lavur e lur engaschament gidan ellas en moda essenziala ad impedir in augment dals custs da sanadad anc pli grond. La situaziun da las persunas che tgiran ed assistan lur confamigliars po dentant er esser fitg engrevgianta, pretensiusa e strapatschanta.
Renconuschientscha finanziala da las prestaziuns da tgira
Per quests motivs vul la Regenza sustegnair er finanzialmain – cun in supplement da tgira – la lavur e l'engaschament da las persunas che tgiran lur confamigliars. Ina part da las prestaziuns da las persunas che tgiran ed assistan lur confamigliars duai vegnir indemnisada en l'avegnir cun in supplement da tgira. «Las persunas che tgiran lur confamigliars èn in element impurtant da noss sistem da sanadad. Senza ellas na pudess il sistem da sanadad betg funcziunar», di il cusseglier guvernativ Peter Peyer, schef dal Departament da giustia, segirezza e sanadad.
Grazia al supplement da tgira duain las persunas pli veglias e las persunas che dovran assistenza pudair abitar uschè ditg sco pussaivel en l'atgna abitaziun u en l'atgna chasa. A vista pli lunga stgaffescha il supplement da tgira in impuls per la tgira ed assistenza a chasa. Ultra da quai po il supplement impedir u almain retardar collocaziuns en chasas da dimora ed en ospitals. Tenor la stimaziun da la Regenza vivan var 300 persunas cun dretg d'in supplement da tgira en il chantun Grischun.
En il conclus da la Regenza vegn proponì in supplement da tgira da 500 francs per mais, analogamain a las regulaziuns dals chantuns Vallais, Vad e Glaruna. La basa giuridica respectiva pudess entrar en vigur il 1. da schaner 2025.
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 16.00 fin las 17.15), e-mail Peter.Peyer@djsg.gr.ch
Responsabladad: Regenza