Suenter ch'i èn vegnidas stgarpadas repetidamain nursas tar attatgas da luf sin muntaneras protegidas en la Val Stussavgia, ha la surveglianza chantunala da chatscha pudì sajettar in luf mastgel creschì dal triep dal Beverin al lieu da l'ultima stgarpada. L'animal sajettà vegn ussa identifitgà cun agid d'ina analisa dal DNA.

La notg dals 8 sin ils 9 da november 2022 ha la surveglianza chantunala da chatscha sajettà in luf mastgel da plirs onns dal triep dal Beverin, quai suenter ch'igl aveva dà pliras stgarpadas da nursas ch'eran protegidas en moda cumpetenta. L'Uffizi federal d'ambient aveva approvà ils 28 d'october 2022 la regulaziun. Sch'i sa tracta tar il luf sajettà dal M92, pia dal luf-bab dal triep dal Beverin che dastga vegnir sajettà, sto vegnir examinà geneticamain.

L'animal vegn analisà patologicamain a l'Institut per medischina da peschs e selvaschina da l'Universitad da Berna ed identifitgà geneticamain en il Laboratori da biologia da conservaziun da l'Universitad da Losanna. Il resultat da l'identificaziun po vegnir communitgà previsiblamain mez december.

Infurmaziuns:

Arno Puorger, collavuratur academic Animals da rapina gronds, Uffizi da chatscha e pestga, tel. +41 81 257 87 67 (cuntanschibel da las 8.30 a las 9.30), e-mail Arno.Puorger@ajf.gr.ch

Responsabladad: Uffizi da chatscha e pestga