Ils 8 da november 2022 è vegnì sajettà in luf-mastgel da plirs onns dal triep dal Beverin sin il territori da la vischnanca da Val Stussavgia. L'analisa genetica da l'animal ha mussà ch'i sa tracta dal luf M92. Quai è l'animal-bab dal triep, che ha chaschunà donns spezialmain gronds.
Tras la sajettada dal luf-bab M92 è terminada la regulaziun dal triep dal Beverin permessa tras l'Uffizi federal d'ambient (UFAM). Il monitoring n'ha purtà fin ussa nagins indizis che l'organisaziun sociala dal triep saja sa midada tras quai. 10 dis suenter la sajettada dal luf-bab han ins per exempel pudì cumprovar a maun d'ina trapla fotografica, ch'in luf creschì, presumtivamain il luf-mamma F37, e sis lufs giuvens da quest onn eran en gir cuminaivlamain sin la Muntogna da Schons. Cun questa observaziun po il chantun ultra da quai ademplir la cundiziun dal UFAM da documentar cun cumprovas controllablas, ch'il triep ha survegnì almain sis chagniels quest onn. Il svilup dal triep dal Beverin vegn observà vinavant. Sche pussaivel vegn in luf dal triep equipà en il decurs da l'enviern u da la primavaira vegninta cun in emettur da GPS.
Sajettà il luf-bab dal triep da Moesola empè d'in luf giuven
Ils 9 d'october 2022 ha la surveglianza da chatscha sajettà in luf dal triep da Moesola sin il territori communal da Valragn. L'analisa genetica ha mussà, ch'i na sa tracta betg d'in luf giuven, mabain dal luf-bab dal triep. Questa sajettada n'era betg cuntegnida en la permissiun dal UFAM. La surveglianza da chatscha è procedida cun quità ed ha sajettà il luf cun l'intenziun d'observar il dretg. A maun dal cumportament e da la grondezza percepida aveva ella classifitgà il luf sco luf giuven e sajettà quel, cura ch'el è turnà – en accumpagnament d'in ulteriur luf – enavos tar ina nursa stgarpada il di avant. Tge consequenzas che la sajettada dal luf-bab ha sin il triep da Moesola, n'è – sco tar il triep dal Beverin – betg previsibel. Ils resultats genetics laschan dentant supponer fitg, ch'il luf-mastgel M297, che na tutgava oriundamain betg tar il triep da Moesola, era s'unì cun il triep apparentamain gia avant ch'il luf-bab è vegnì sajettà. Ulteriuras cumprovas da las ultimas emnas mussan ch'i dat – er suenter la sajettada – almain dus lufs creschids en il triep.
L'Uffizi federal d'ambient è infurmà
L'Uffizi da chatscha e pestga cumpetent è en contact cun il UFAM. Sco proxims pass vegnan las enconuschientschas da las observaziuns dal triep dal Beverin communitgadas periodicamain, e la sajettada dal luf dal triep da Moesola vegn documentada confurm a l'urden.
Infurmaziuns:
Arno Puorger, collavuratur academic Animals da rapina gronds, Uffizi da chatscha e pestga, tel. +41 81 257 87 67 (cuntanschibel fin las 12.00), e-mail Arno.Puorger@ajf.gr.ch
Responsabladad: Uffizi da chatscha e pestga