La Regenza ha approvà la revisiun parziala da la planisaziun locala che la vischnanca da Val Müstair aveva concludì ils 23 da mars 2022. Uschia stgaffescha ella las premissas da la planisaziun d'utilisaziun per spustar la senda da viandar «A la riva dal Rom» sin il traject tranter Sielva e Chasseras da la vart dretga dal Rom. Il motiv per il spustament è il trassé actual che maina – sin ina lunghezza da var 200 meters – sur la punt e sur il rempar da la via chantunala. Sin quest traject manca in passape sco er in vial da velos. Er las prescripziuns concernent la construcziun senza obstachels n'èn betg ademplidas. Perquai exista ina gronda ristga per la segirezza da las viandantas e dals viandants. Questa mancanza duai vegnir eliminada.

La planisaziun actuala duai plinavant segirar la ruta alternativa da Lü a l'Alp Champatsch. Quella maina sin ina veglia senda chavorgia che sa chatta in pau sut la senda actuala. A medem temp èsi planisà d'abolir la senda da viandar Valpaschun. Il trassé actual tranter Lü e l'Alp Champatsch maina sin ina via agricula e forestala. Ultra da l'utilisaziun tras il traffic motorisà cumpiglia quest traject er tut en tut quatter rutas da SvizraMobila. Il potenzial da conflicts tranter las differentas gruppas d'utilisaziun è s'augmentà cuntinuadamain ils ultims onns pervia da l'augment dal dumber da viandantas e viandants sco er da ciclistas e ciclists da muntogna. Tras il spustament da la senda da viandar po vegnir mitigiada la situaziun. Grazia a questa mesira pon dal rest vegnir quietads dus territoris impurtants per la selvaschina.

© Comet Photoshopping GmbH, Dieter Enz

La Regenza ha prendì enconuschientscha dal fatg ch'i na vegnan suttamess nagins projects federals a la votaziun dal pievel da la dumengia dals 12 da mars 2023.

Sin plaun chantunal vegni votà davart la suandanta fatschenta:

• Realisaziun dal Center da scola auta spezialisada dal Grischun.