L'Uffizi per la scola populara ed il sport e l'Uffizi da sanadad han concludì da sa participar a la «rait da scolas21 – rait svizra da scolas persistentas che promovan la sanadad». Uschia daventan la promoziun da la sanadad e la prevenziun accessiblas a tut ils uffants, a las persunas d'instrucziun, a las direcziuns da scola sco er ad ulteriuras persunas ch'èn involvidas en la scola.

Ils uffants ed ils giuvenils passentan ina gronda part da lur mintgadi en scola. Els emprendan la materia da scola, ma els emprendan cunzunt er per la vita. La promoziun da la sanadad e la prevenziun èn spezialmain efficazias durant questa fasa da la vita. Ina scola che promova la sanadad sustegna il bainesser da tut las persunas participadas. Quai ha effects positivs duraivels sin la sanadad e sin ils custs. Ensemen cun l'Uffizi per la scola populara ed il sport e tenor las basas da la rait da scolas21 naziunala organisescha l'Uffizi da sanadad la cussegliaziun per las scolas en il chantun Grischun. Per quest intent ha l'Uffizi da sanadad endrizzà in post da coordinaziun «rait da scolas21 graubünden | grischun | grigioni».

Purschida da sustegn per las scolas
Las scolas grischunas che vulan daventar scolas che promovan la sanadad, vegnan accumpagnadas e sustegnidas da persunas spezialisadas. Cun la Scola auta da pedagogia dal Grischun han ins chattà ina partenaria impurtanta per realisar las cussegliaziuns. Mintga scola decida sezza, nua ch'ella cumenza. Ils temas èn multifars: clima da scola, sanadad psicosociala da scolaras e scolars, direcziun da scola e/u persunas d'instrucziun, nutriment saun e promoziun dal moviment en il mintgadi da scola, prevenziun da dependenzas, participaziun, concepziun natirala dals conturns e bler auter. A l'influenza reciproca tranter furmaziun e sanadad vegn dà in grond pais.

Visiun per il Grischun
A tut las persunas ch'èn involvidas en la scola stattan a disposiziun purschidas e structuras che promovan in stil da viver saun e che gidan a mantegnair la sanadad e la capacitad fisica.

Infurmaziuns detagliadas davart la «rait da scolas21 Graubünden | Grischun | Grigioni» stattan a disposiziun sin www.gr.ch/sn21.

Infurmaziuns:

Denise Rudin, manadra da la partiziun Promoziun da la sanadad e prevenziun, Uffizi da sanadad dal Grischun, tel. +41 81 257 64 02, e‑mail Denise.Rudin@san.gr.ch

Responsabladad: Uffizi da sanadad