Dunnas èn stgarsas en la politica communala. Il studi «PROMO Femina» ha confermà quai ed ha sviluppà mesiras per meglierar la participaziun. Ussa suonda il check da realitad: A l'occurrenza «La Bregaglia femminile» ils 26 da schaner 2023 a Soglio discutan persunas interessadas, co che las mesiras proponidas pon vegnir francadas localmain.

Las vischnancas han ina posiziun impurtanta en Svizra: Sin il plaun ch'è il pli datiers da las burgaisas e dals burgais vegnan prendidas decisiuns politicas impurtantas che influenzeschan directamain la vita quotidiana. A medem temp èn las vischnancas confruntadas cun grondas sfidas. Tematicamain arrivan ellas a lur cunfins da prestaziun per ademplir lur incumbensas, ed organisatoricamain procuran la transfurmaziun digitala sco er l'occupaziun d'uffizis communals per quitads.

Memia paucas forzas giuvnas
Var la mesadad da las vischnancas ha difficultads da recrutar candidatas e candidats adattads. La culpa da quai è d'ina vart il grond dumber d'uffizis communals. Da l'autra vart sa sminuescha tendenzialmain la prontezza da la populaziun da s'engaschar formalmain ed en uffizi d'onur. «Sch'ins gudagnass dapli dunnas per la politica communala, fiss quest plaun impurtant rinforzà», declera Barbara Wülser, manadra dal Post da stab per l'egualitad da las schanzas.

Mo 14 pertschient dals presidis communals en il Grischun han dunnas, sco ch'ina retschertga da l'Uffizi da vischnancas ha cumprovà il schaner 2022. Er tar las suprastanzas communalas sa chatta la quota da dunnas cun 21 pertschient sut la media svizra da 25 pertschient. Sumegliantamain sa preschenta la situaziun en ils parlaments communals ed en las cumissiuns communalas. En la vischnanca fusiunada Bregaglia importa la quota da dunnas actualmain 0 pertschient. En il project da perscrutaziun «PROMO Femina» da la Scola auta spezialisada dal Grischun (SASGR) è vegnì sviluppà cun il sustegn dal Post da stab sco er da quatter ulteriurs chantuns in tool online che mussa vias e mesiras, co che dunnas pon vegnir motivadas per la politica. Ussa va «PROMO Femina» sin turnea tras il Grischun.

Referentas da vaglia
A l'occurrenza «La Bregaglia femminile» che ha lieu gievgia, ils 26 da schaner 2023 a partir da las 17.00 en il hotel Soglina a Soglio, vegnan preschentadas las mesiras da «PROMO Femina», discutadas e sviluppadas vinavant per las relaziuns al lieu. Il Post da stab per l'egualitad da las schanzas, il Center per management d'administraziun da la SASGR ed il «Laboratorio vivente Bregaglia» da la SASGR envidan persunas interessadas, dunnas e represchentantas e represchentants da vischnancas, da partidas e da raits da sa deditgar al tema da la participaziun politica sin plaun communal. A l'occurrenza dattan per l'ina Anna Giacometti, cussegliera naziunala da la PLD ed anteriura presidenta communala da Bregaglia, e Nora Saratz Cazin, presidenta communala da Puntraschigna e commembra dal Cussegl grond da la PVL, ina invista da lur carriera e da lur experientschas politicas. Per l'autra pon las participantas ed ils participants s'occupar profundamain cun las relaziuns da la Bregaglia en in local moderà avert. L'occurrenza «La Bregaglia femminile» vegn realisada en moda bilingua en tudestg e talian, senza translaziun simultana. Ella è gratuita ed è averta per tut las persunas interessadas. I vegn giavischà da s'annunziar sut www.gr.ch/va-stagl.li.

Il format duai vegnir realisà sut il titel «PROMO Femina on Tour» en ulteriuras regiuns en il Grischun. Il project vegn sustegnì finanzialmain dal chantun, da la Fundaziun per educaziun e scolaziun civica, da la fundaziun Willi Muntwyler sco er da la vischnanca da Bregaglia.

Infurmaziuns:

• Barbara Wülser, manadra dal Post da stab per l'egualitad da las schanzas, tel. +41 81 257 35 71, e‑mail Barbara.Wuelser@stagl.gr.ch
• Ruth Nieffer, manadra da project al Center per management d'administraziun, Scola auta spezialisada dal Grischun, tel. +41 81 286 39 18, e‑mail Ruth.Nieffer@fhgr.ch

Responsabladad: Post da stab per l'egualitad da las schanzas