La Cumissiun dal Cussegl grond per giustia e segirezza (CGS) ha annullà la procedura ch'era vegnida instradada cunter il derschader administrativ inculpà. Per la plazza ch'è daventada libra suenter la demissiun dal derschader vegn preparada in'elecziun substitutiva. Plinavant survegn la Dretgira administrativa temporarmain dapli persunal tras l'elecziun da derschadras e derschaders extraordinaris.

Ils 14 da december 2022 ha il derschader administrativ declerà envers la CGS ch'el demissiuneschia per la fin da l'onn. Cunquai ch'el ha remess ses uffizi, è la procedura da surveglianza ch'era vegnida averta cunter el ils 24 d'avust 2022, daventada obsoleta areguard il dretg administrativ. La CGS ha perquai serrà ed annullà formalmain la procedura. La procedura n'aveva betg ina finamira penala, mabain dueva giuditgar las renfatschas tenor il dretg da surveglianza. Sin fundament da las reglas dal stadi da dretg, che valan er en chaussas dal dretg da surveglianza, ha la CGS stuì proceder cun quità ed observar tut ils dretgs e tut las garanzias processualas dal derschader pertutgà. Per l'inquisiziun penala da las renfatschas è vinavant cumpetenta la Procura publica.

Plinavant stoi vegnir menziunà che la cumissiun prenda serius ed examinescha ils indizis davart abus da pussanza. Per la CGS èsi impurtant ch'ins respectia – a las dretgiras ch'èn suttamessas a sia surveglianza directa – l'integritad persunala da tut las persunas che lavuran là.

Elecziun substitutiva ed elecziun da derschadras e derschaders extraordinaris
La prioritad da la CGS è actualmain quella da sustegnair la Dretgira administrativa dal Grischun a serrar svelt la largia, ch'è resultada tras la demissiun dal derschader administrativ. En quest connex èn vegnidas prendidas immediatamain tut las mesiras necessarias. L'elecziun substitutiva è previsa per la sessiun da zercladur 2023.

Perquai che Urs Meisser, ch'è stà durant blers onns president da la Dretgira administrativa, ha demissiunà per ils 31 da mars 2023, ma er en consequenza da la reorganisaziun da las dretgiras chantunalas superiuras (fusiun ad ina Dretgira superiura per il 1. da schaner 2025), resultan incumbensas supplementaras considerablas areguard il persunal e l'administraziun. Sin dumonda da la Dretgira administrativa ha la CGS perquai permess derschadras e derschaders extraordinaris. Ellas ed els vegnan a rinforzar la dretgira fin ils 31 da december 2024 cun 200 ulteriurs pertschients da plazzas. Tras l'elecziun da Lionella Zanolari Hasse e da Pierluigi Paganini ha la CGS gia pudì occupar ina part da questas plazzas supplementaras. Ultra da quai stat Urs Meisser a disposiziun a la Dretgira administrativa per trais ulteriurs mais sco derschader extraordinari. Uschia èsi garantì che la dretgira è abla da liquidar ils cas pendents entaifer in termin adequat. La finamira da la cumissiun e da las dretgiras è adina er quella da pudair garantir a las persunas che tschertgan dretg betg mo ina giurisdicziun d'auta qualitad, mabain er ina giurisdicziun effizienta.

Infurmaziuns:

Presidenta da la cumissiun Julia Müller, E‑Mail julia.mueller@spin.ch (respundidas vegnan mo dumondas en scrit)

Responsabladad: Cussegl grond / Cumissiun per giustia e segirezza