L'ambassadura svizra en l'Italia, Monika Schmutz Kirgöz, ha visità oz – sin invit da la Regenza – il chantun Grischun. Il discurs da lavur è stà l'occasiun per discutar differents interess transcunfinals dal chantun Grischun.

L'ambassadura svizra Monika Schmutz Kirgöz è vegnida beneventada oz en la Chasa grischa a Cuira da la Regenza cumpletta. Sut la direcziun dal president da la Regenza Peter Peyer èn sa participads al bainvegni ils cussegliers guvernativs Marcus Caduff, Jon Domenic Parolini e Martin Bühler, la cussegliera guvernativa Carmelia Maissen sco er il chancelier Daniel Spadin e l'incumbensà per relaziuns externas Carlo Crameri.

En il center dals discurs èn stadas las relaziuns bilateralas cun las regiuns vischinas talianas. Ultra da quai han las participantas ed ils participants tractà differents temas transcunfinals, tranter auter l'augment dal grad d'enconuschientscha da la lingua rumantscha en l'Italia, il presidi dals chantuns svizzers en la EUSALP sco er las activitads dals differents programs da cooperaziun regiunals tranter l'Italia e la Svizra.

La Regenza grischuna tgira ils contacts cun las represchentantas ed ils represchentants da la Svizra en ils stadis vischins cunfinants. Quests discurs èn elements impurtants da las relaziuns dal chantun Grischun cun l'exteriur. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutads savens dumondas e temas specifics actuals.

Fotografia agiuntada:

Da sanestra: Il chancelier Daniel Spadin, il cusseglier guvernativ Marcus Caduff, la cussegliera guvernativa Carmelia Maissen, il president da la Regenza Peter Peyer, il cusseglier guvernativ Martin Bühler, Monika Schmutz Kirgöz, il cusseglier guvernativ Jon Domenic Parolini e l'incumbensà per relaziuns externas Carlo Crameri.

Infurmaziuns:

President da la Regenza Peter Peyer, schef dal Departament da giustia, segirezza e sanadad, e‑mail Peter.Peyer@djsg.gr.ch

Responsabladad: Regenza