La Regenza surdat il Premi grischun da cultura 2023 a Tilla Theus ch'è naschida e creschida si a Cuira. Il premi è dotà cun 30 000 francs. Particularmain cun chasas communalas, cun edifizis d'abitar e da fatschenta sco er cun hotels ha l'architecta grischuna stgaffì in'ovra preziusa. La dunna da bainbaud 80 onns è ina maistra da ses mastergn ed ha renovà la cultura da construcziun. Sco artista da construcziun è ella ida e va ella atgnas vias e sco architecta è ella sa fatga valair en in mund dad umens. Tilla Theus che viva a Turitg ed a Valbella ha er realisà ina retscha da projects en il chantun Grischun. Da sias ovras pli giuvnas enconuschan ins bain il restaurant da muntogna elegant sin il Weisshorn ad Arosa. Attenziun internaziunala ha ella obtegnì cun la renovaziun da l'hotel Widder a Turitg sco er cun il nov quartier principal da la FIFA. Tilla Theus s'engascha er en moda multifara per la politica culturala, uschia en gremis da la tgira da monuments, en collegis da construcziun, ma er en la Societad svizra per studis prospectivs. Ultra da quai l'ha il ranking da l'Institut Gottlieb Duttweiler mess avant 10 onns sin plazza 20 da las persunalitads cun la pli gronda influenza en Svizra.

Plinavant surdat la Regenza sis premis da renconuschientscha e tschintg premis da promoziun da mintgamai 20 000 francs. Ils premis vegnan surdads ils 30 da zercladur 2023 en il rom d'ina festa a Cuira.

Glista da tut las persunas premiadas da l'onn 2023

© Ethan Oelmann

La Regenza ha approvà la revisiun parziala da la planisaziun locala che la vischnanca da Lantsch ha concludì ils 26 da settember 2022. Uschia stgaffescha ella las premissas da la planisaziun dal territori per engrondir il center da biatlon Bual (Arena da biatlon a Lai). Concretamain vegn la zona per edifizis e per stabiliments publics existenta midada en ina zona speziala «Bual» ed engrondida vers vest en il sectur dal stadion per var 10 000 meters quadrat. Ultra da quai vegn questa zona speziala per lung da l'ur existent dal guaud cumplettada cun ina lingia da distanza dal guaud.

Motiv per questa revisiun parziala da la planisaziun locala è l'organisaziun dal campiunadi mundial da biatlon planisà per l'onn 2025 en l'Arena da biatlon a Lai. Cun organisar l'emprima cuppa mundiala da biatlon il december 2022 han ins bain gia fatg bunas experientschas, la realisaziun d'in campiunadi mundial che dura plirs dis surpassa dentant per bler la dimensiun d'ina cursa da la cuppa mundiala. Las adattaziuns vi dal center da biatlon Bual ch'èn gia vegnidas fatgas en il passà èn ina buna basa, na bastan dentant betg per ademplir tut las pretensiuns ch'i dovra per realisar in campiunadi mundial. Il campiunadi mundial ha lieu dals 11 fin ils 23 da favrer 2025.

© Andrea Badrutt, Cuira

La Regenza ha approvà il project «Protecziun cunter crudadas da crappa sin la via da Riein» en la vischnanca dad Ilanz/Glion. Ils custs totals dal project da construcziun importan var 770 000 francs.

La via da Riein tranter ils vitgs da Sevgein e da Riein maina sut ina strivla da grip marcanta ora, e quai sin in traject da circa 1 kilometer lunghezza. Da questa strivla da grip èn ruts ora durant ils ultims decennis repetidamain er volumens da grip pli gronds, tranter auter la primavaira 2015, cura che var 10 000 meters cubic material èn crudads giu en la Val Schlusaus. Er pli al sid èn repetidamain vegnidas registradas crudadas da crappa fin giu sin la via. Pervia da questas crudadas ha la via per part stuì vegnir serrada sur uras e dis. Il project ha la finamira da proteger ils trajects respectivs da la via da Riein cunter eveniments da crudadas, perquai che quests trajects èn periclitads malgrà ils rempars da protecziun existents. Per quest intent duain vegnir installadas – da la vart da la muntogna da la via da Riein – barrieras da protecziun cunter crudadas da crappa. Las palissadas temporaras e las ovras antiquadas e nunaccessiblas duain vegnir demontadas. L'Uffizi da construcziun bassa planisescha da realisar il project da construcziun fin la fin dal 2023.