Il rapport da monitoring da «viamia» 2022, ch'è vegnì realisà per incumbensa dal Secretariat da stadi per furmaziun, retschertga ed innovaziun (SEFRI), mussa che la purschida da la cussegliaziun da professiun, da studi e da carriera chatta in bun resun. Tenor il giudicament da las participantas e dals participants è la cussegliaziun fitg buna. Ellas ed els recumandassan ina cussegliaziun er ad autras persunas.

Sco ina da set mesiras per promover il potenzial da las forzas da lavur svizras ha la cussegliaziun da professiun, da studi e da carriera introducì il 1. da schaner 2022 en l'entira Svizra il product «viamia». La finamira da «viamia» è quella d'eruir la situaziun professiunala e persunala da persunas da 40 onns e dapli cun agid d'ina analisa regulara da la situaziun. E resguardond il fatg che las pretensiuns sin il martgà da lavur sa midan cuntinuadamain, duain plinavant vegnir deducidas ad ura eventualas mesiras. Uschia duai la cumpetitivitad individuala sin il martgà da lavur vegnir mantegnida a lunga vista per questas persunas.

Gronda cuntentientscha da las participantas e dals participants dal Grischun
Il rapport da «viamia» 2022 sa cumpona da las datas dals chantuns sco er d'in resun voluntar da la clientella suenter la finiziun da las cussegliaziuns. Tut en tut han ils chantuns annunzià per l'onn 2022 stgars 5000 cas lantschads e terminads. Al resun da la clientella èn sa participadas var 2000 persunas cussegliadas.

Dapi l'introducziun l'onn 2022 han var 130 persunas en il Grischun fatg diever da la purschida da «viamia». A l'enquista naziunala èn sa participadas 36 persunas dal Grischun. La lavur da las cussegliadras e dals cussegliaders da carriera han ellas giuditgà en media cun la fitg buna nota 5,7 (da maximalmain 6). 94 pertschient da las persunas interrogadas recumandassan ultra da quai ina cussegliaziun er ad autras persunas. L'ulteriur svilup professiunal u il giavisch general da far ina midada, èn stads ils motivs principals per far diever d'ina cussegliaziun. «Viamia» ha cuntanschì participantas e participants da las pli diversas branschas cun differentas vias da furmaziun. «Ord nossa vista è la nova purschida bain stada pretensiusa, ma er fitg captivanta l'emprim onn», rapporta Andreas Zuber, manader dal team Cussegliaziun da carriera da l'Uffizi per la furmaziun professiunala.

Analisa da la situaziun persunala e professiunala
Las participantas ed ils participants da «viamia» percurran in process cleramain definì. En in emprim pass vegnan valitadas las atgnas schanzas sin il martgà da lavur en il rom d'in test. Ils resultats servan sco basa per l'analisa da la situaziun, vul dir per eruir la situaziun persunala e professiunala e per identifitgar in eventual basegn d'agir. Ensemen cun ina cussegliadra u in cussegliader da carriera vegnan deducidas mesiras concretas per mantegnair u per meglierar la cumpetitivitad da las participantas e dals participants sin il martgà da lavur. Sche necessari han lieu ulteriurs discurs da cussegliaziun. Suenter l'ultim discurs vegnan ils resultats da la cussegliaziun integrads en in rapport da cussegliaziun e tramess a las participantas ed als participants.

Ulteriuras infurmaziuns davart «viamia» e davart il rapport da monitoring 2022 stattan a disposiziun sin www.viamia.ch e sin berufsbildung2030.ch.

Infurmaziuns:

• Petra Wyss, manadra da la partiziun Cussegliaziun da professiun, da studi e da carriera, tel. +41 81 257 27 05 (cuntanschibla da las 08.00 fin las 09.30 u da las 15.00 fin las 17.00), e‑mail Petra.Wyss@afb.gr.ch
• Andreas Zuber, manader dal team Cussegliaziun da carriera, tel. +41 81 257 62 01 (cuntanschibel da las 08.00 fin las 09.30 u da las 15.00 fin las 17.00), e‑mail Andreas.Zuber@afb.gr.ch

Responsabladad: Uffizi per la furmaziun professiunala