Il 1. da matg 2023 cumenzan las lavurs da construcziun per la nova Dretgira superiura a Cuira. Cun l'engrondiment e cun la sanaziun da l'edifizi chantunal existent vegnan stgaffidas er las premissas manaschialas per realisar la Refurma da las dretgiras 3. L'atun 2025 duai l'edifizi esser pront per la Dretgira superiura.

Per la fusiun da la Dretgira chantunala cun la Dretgira administrativa ad ina Dretgira superiura è l'edifizi chantunal en il center da la citad da Cuira vegnì fixà sco nova sedia. L'edifizi chantunal ch'è passa 140 onns vegl vegn renovà tenor criteris da la tgira da monuments ed engrondì cun in tract nov.

A chaschun da la votaziun dal pievel dals 27 da november 2022 han las votantas grischunas ed ils votants grischuns approvà il credit d'impegn da 29 milliuns francs per il project. Il november 2022 ha la citad da Cuira er concedì la permissiun da construcziun.

En il rom d'ina procedura da selecziun da planisaders han ins surdà l'incumbensa da projectaziun al team «Aebi & Vincent Architekten SA» da Berna e «Fanzun SA Architekten Ingenieure Berater» da Cuira. Sut la direcziun da l'Uffizi da construcziun auta dal Grischun han ils architects elavurà il project preliminar ed il project da construcziun, quai ensemen cun las futuras utilisadras.

Edifizi d'impurtanza istorica vegn engrondì cun in tract nov
Quest emprim edifizi chantunal uffizial dal chantun Grischun, ch'è vegnì construì ils onns 1877/1878, serviva oriundamain sco sedia dal Cussegl grond, da la Banca Chantunala Grischuna e da la Dretgira chantunala. Dapi ils onns 1920 ha el dà suttetg a l'administraziun centrala da l'Uffizi chantunal da construcziun bassa.
Tras la sanaziun vegnan l'anteriura sala dal Cussegl grond, che s'extenda sur dus plauns, e la veglia curt interna renovadas tenor criteris da la tgira da monuments. Las cuvridas decorativas dals palantschieus vegnan allontanadas ed alura reintegradas confurm a l'original suenter la restauraziun. Er las fanestras artisanalas istoricas da l'anteriura sala dal Cussegl grond vegnan puspè montadas en la gronda sala da dretgira. Ils elements centrals da la nova Dretgira superiura èn las duas salas da dretgira en l'edifizi vegl. Cumplettadas vegnan quellas cun stanzas per las partidas, per las derschadras ed ils derschaders e per sesidas, cun ina biblioteca, cun biros d'ina persuna e da teams sco er cun locals accessorics ed ina chanzlia cun spurtegl e cun foyer.

En il tract nov vegnan construids biros d'ina persuna e da teams, ina cafetaria ed ina garascha sutterrana. Il tract nov è accessibel sur las stgalas istoricas e sur in ascensur nov. Il nov parc tranter la Villa Brügger, il pavigliun d'iert e la nova Dretgira superiura augmentan la valur architectonica ed urbanistica da l'entir cumplex.

Persistenza e tgira da monuments
Tar las intervenziuns en l'edifizi existent vegnan las finamiras da persistenza ademplidas il meglier pussaivel sut l'aspect da la substanza architectonica istorica e da la tgira da monuments. Ils indrizs tecnics vegnan remplazzads e las infrastructuras electrotecnicas vegnan adattadas a las utilisaziuns futuras. Las pretensiuns envers la protecziun cunter incendis ed envers la segirezza cunter terratrembels sco er l'accessibladad senza obstachels vegnan realisadas en moda consequenta. Il tract nov vegn construì tenor ils standards da Minergie-P-Eco.

Il 1. da matg 2023 cumenzan las lavurs da construcziun che duran circa 2 onns e mez. Suenter las lavurs preparatoricas e l'installaziun dal plazzal vegni cumenzà avant las vacanzas da stad 2023 cun las lavurs da demontascha e cun il stgav dal foss da construcziun. A la fin da la stad da quest onn suondan las lavurs da la construcziun brutta per la garascha sutterrana. Ils mirs exteriurs da l'edifizi vegnan terminads fin la fin da l'onn 2024, las ulteriuras lavurs da construcziun duain esser a fin l'atun 2025.

Visualisaziun:

Visualisaziun 2 | © Aebi & Vincent Architekten SIA AG

Agiunta:

Fegl d'infurmaziun

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilita, tel. +41 81 257 36 05 (cuntanschibla da las 12.00 fin las 13.00), e‑mail Carmelia.Maissen@diem.gr.ch
• Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 12.00 fin las 13.00), e‑mail Andreas.Kohne@hba.gr.ch