La Regenza ha approvà la revisiun da l'Ordinaziun davart las vias dal chantun Grischun. Plinavant ha ella concedì ina contribuziun chantunala per restaurar l'hotel «Löwe» a Mulegns e dà glisch verda a la construcziun da rempars per la Turnigla a Trin.
Approvà la revisiun parziala da l'Ordinaziun davart las vias
La Regenza ha approvà la revisiun parziala da l'Ordinaziun davart las vias dal chantun Grischun. La Lescha chantunala davart las vias regla la projectaziun, la construcziun, il mantegniment, l'utilisaziun e la finanziaziun da las vias chantunalas sco er las cumpetenzas e las incumbensas areguard il traffic betg motorisà. L'ordinaziun concretisescha las prescripziuns da la lescha tant areguard las vias chantunalas sco er areguard il traffic betg motorisà.
Tras la revisiun parziala ch'è ussa avant maun vegnan optimadas differentas disposiziuns da l'Ordinaziun davart las vias. En l'avegnir pon tranter auter vegnir pajadas contribuziuns chantunalas pli autas per vias da velo dal traffic quotidian e dal traffic da temp liber sco er per sendas da viandar. Da nov survegnan vias da velo dal traffic quotidian ina contribuziun chantunala da 50 pertschient, sch'ellas correspundan ad in «interess chantunal» tenor il Plan sectorial Velo, ed ina contribuziun chantunala dad 80 pertschient, sche l'interess chantunal è «predominant». Er vias da velo dal traffic da temp liber e sendas da viandar duain survegnir in sustegn finanzial pli grond. Sch'ellas correspundan ad in «interess chantunal», vegn concedida ina contribuziun chantunala da 30 pertschient. Sch'ellas correspundan ad in «interess chantunal predominant» u sch'ellas gidan a separar il traffic, vegn pajada ina contribuziun da 60 pertschient. Quai è per exempel il cas, sch'i vegnan eliminads conflicts tranter viandantas e viandants d'ina vart e ciclistas e ciclists da l'autra vart.
A las vischnancas, a las societads dal provediment d'energia ed a las interpresas instituziunalas metta il chantun plinavant a disposiziun gratuitamain l'infrastructura stradala chantunala per stabiliments che produceschan energias regenerablas, uschenavant ch'el approvescha il project respectiv. Uschia presta il chantun ina contribuziun, per ch'i vegnia producì dapli electricitad, ed el promova energias regenerablas.
La Regenza ha approvà la revisiun parziala da l'Ordinaziun davart las vias dal chantun Grischun. La Lescha chantunala davart las vias regla la projectaziun, la construcziun, il mantegniment, l'utilisaziun e la finanziaziun da las vias chantunalas sco er las cumpetenzas e las incumbensas areguard il traffic betg motorisà. L'ordinaziun concretisescha las prescripziuns da la lescha tant areguard las vias chantunalas sco er areguard il traffic betg motorisà.
Contribuziun chantunala per la segunda fasa da la restauraziun da l'hotel «Löwe» a Mulegns
L'hotel «Löwe» è situà a l'entrada sid dal vitg da Mulegns sper la via dal Güglia. El è ina da las paucas perditgas che datescha dal temp da la construcziun tempriva d'hotels en il Grischun e ch'è per gronda part anc en in stadi autentic. L'hotel ch'è vegnì construì l'onn 1870 ed engrondì fundamentalmain l'onn 1897, regorda a l'emprim temp da fluriziun dal turissem e dal traffic da charrotschas da posta en il Grischun. L'hotel e la chasa da posta caracteristica dattan ina impressiun da la relevanza sociala ed economica dal manaschi d'hotel sco er da sia impurtanza per l'architectura locala.
L'onn 2019 ha la Nova Fundaziun Origen surpiglià l'hotel. Ussa vegn la chasa renovada cun quità per pussibilitar in manaschi simpel. En in'emprima fasa (communicaziun da la Regenza dals 3 da settember 2020) han ins sanà il tetg ch'era per part donnegià, sco er restaurà la fatschada e las fanestras. En il rom da la segunda fasa èsi cunzunt planisà da renovar las chombras, ils locals per ils giasts, ma er l'infrastructura, sco la cuschina, las installaziuns electricas ed il stgaudament. La chasa da posta daventa butia, recepziun e centrala dal stgaudament. Per la segunda fasa da la renovaziun totala ha la Regenza concedì ina contribuziun chantunala maximala da var 189 000 francs a la Nova Fundaziun Origen. Ils custs totals dal project importan circa 6,3 milliuns francs.
© Nova Fundaziun Origen
L'hotel «Löwe» è situà a l'entrada sid dal vitg da Mulegns sper la via dal Güglia. El è ina da las paucas perditgas che datescha dal temp da la construcziun tempriva d'hotels en il Grischun e ch'è per gronda part anc en in stadi autentic. Ussa vegn la chasa renovada cun quità per pussibilitar in manaschi simpel. Per la segunda fasa da la renovaziun totala ha la Regenza concedì ina contribuziun chantunala maximala da var 189 000 francs a la Nova Fundaziun Origen.
Approvà la construcziun da rempars per la Turnigla a Trin
La Regenza ha approvà in project per construir rempars per la Turnigla en la vischnanca da Trin. Dals custs totals da var 194 000 francs surpiglian il chantun e la Confederaziun – tenor la cunvegna da program da la Nova gulivaziun da finanzas (NGF) – maximalmain var 106 700 francs.
L'avust 2021 aveva ina malaura chaschunà aua gronda en la Turnigla, che ha per part lavà ora il letg da l'aual e las scarpas da la riva sin il traject «Resgia» (davent da la resgia fin al passadi grond). Per impedir donns consecutivs ha la vischnanca da Trin perquai decidì da reparar ils donns. Ils rempars da riva donnegiads vegnan construids da nov sin ina lunghezza da circa 8 meters da la vart sanestra e da circa 20 meters da la vart dretga e colliads cun ils mirs d'ala en il sectur d'entrada dal passadi grond. En quest sectur vegn plinavant installada ina rampa d'ina lunghezza da var 11 meters en il letg da l'aual, quai per stabilisar il letg da l'aual e per proteger tal cunter ulteriuras erosiuns futuras.
La Regenza ha approvà in project per construir rempars per la Turnigla en la vischnanca da Trin. Dals custs totals da var 194 000 francs surpiglian il chantun e la Confederaziun – tenor la cunvegna da program da la Nova gulivaziun da finanzas (NGF) – maximalmain var 106 700 francs.
