La Regenza propona al Cussegl grond en il rom dal preventiv 2024 ina reducziun dal pe da taglia da 5 pertschient per las persunas natiralas. A partir da l'onn 2025 importa la distgargia fiscala annualmain bundant 32 milliuns francs. Uschia duai vegnir fatg in emprim pass per realisar l'incumbensa Hohl dal Cussegl Grond concernent distgargias fiscalas per famiglias e per persunas spezialisadas. Il segund pass è planisà cun ina revisiun da la Lescha da taglia per il chantun Grischun l'onn 2025. La libertad d'agir finanziala duai uschia vegnir tratga a niz cumplainamain.

Durant la sessiun da favrer 2023 ha il Cussegl grond acceptà l'incumbensa Hohl concernent distgargias fiscalas per famiglias e per persunas spezialisadas. Uschia duain las libertads d'agir da la politica da finanzas dal chantun e da las vischnancas vegnir duvradas sistematicamain per meglierar vinavant las cundiziuns generalas fiscalas en il Grischun. La Regenza ha l'intenziun da realisar questa incumbensa en dus pass. Cun il preventiv 2024 e pia uschè svelt sco pussaivel, duain las taglias sin las entradas, las taglias sin la facultad e las taglias a la funtauna dal chantun vegnir sbassadas per 5 pertschient. Da quai profitan primarmain las famiglias e las persunas cun activitad da gudogn en il chantun, ma er persunas che van en pensiun sco er possessuras e possessurs d'abitaziuns secundaras cun domicil ordaifer il Grischun. A partir da l'onn 2025 ha la reducziun dal pe da taglia respectiva consequenzas d'annualmain var 32 milliuns. 6 milliuns da quests daners tutgan a las taglias sin la facultad. Las vischnancas na vegnan betg tangadas da questa mesira.

Finanziaziun da la reducziun dal pe da taglia 2024
Las perditas da taglia dal chantun duain vegnir finanziadas tras futurs deficits dal quint da l'agen chapital a libra disposiziun ed uschia a medem temp – sco pretendì dal Cussegl Grond – «restituir daners ch'èn vegnids pajads da memia» ils ultims onns als pajataglias. Ils ultims onns ha il chantun cuntanschì auts retgavs cumulads ed uschia stgaffì reservas a libra disposiziun dad en il fratemp 735 milliuns (december 2022). Fin la fin da l'onn 2024 vegn spetgada ina reserva en la dimensiun dad 850 milliuns. Da quels duain tut en tut 240 milliuns vegnir duvrads per finanziar la reducziun dal pe da taglia en il decurs dals proxims 8 onns. En il futur duain cun questas reservas er vegnir cuvridas perditas da las distribuziuns dal gudogn da la Banca naziunala svizra (BNS) e culminaziuns d'investiziun pervia da projects gronds en il champ social, da sanadad e da furmaziun. Ultra da quai duain uschia il chapital da partenza per il fond per il clima, ch'è destinà per realisar il plan d'acziun Green Deal e per eventualas situaziuns d'urgenza pervia d'eveniments da crisa u per ina reducziun massiva da la conjunctura vegnir finanziads.

Revisiun da la Lescha chantunala da taglia sco segund pass l'onn 2025
En elavuraziun è il segund pass per realisar l'incumbensa Hohl. L'incumbensa vul distgargiar uschè sistematicamain sco pussaivel las famiglias e las persunas spezialisadas da taglias sin las entradas dal chantun e da las vischnancas. Per quest intent è necessaria ina revisiun da la Lescha chantunala da taglia. A favur da las famiglias e da las persunas cun activitad da gudogn duain per questa revisiun da la Lescha da taglia vegnir mess a disposiziun annualmain ulteriurs 20 milliuns a quint da las finanzas chantunalas. Cumplementarmain resultass da quests daners ina distgargia supplementara tar las taglias communalas d'approximativamain 18 milliuns. Pervia da quai ha la Regenza l'intenziun da realisar ina consultaziun cumplessiva la primavaira 2024. La missiva correspundenta al Cussegl grond è planisada per l'onn 2025 e l'entrada en vigur per il 1. da schaner 2026. A partir da l'onn fiscal 2026 ed a partir da l'onn da retgav 2027 duai ella avair effect.

Consolidà resulta en cas d'ina realisaziun cumpletta da l'incumbensa Hohl il suandant maletg:

Cun quest pachet dubel sa lascha cuntanscher in effect general considerabel per las persunas natiralas. La participaziun da las vischnancas a la meglieraziun da l'attractivitad fiscala dal Grischun è impurtanta e giustifitgada. Las vischnancas profitan dals effects economics positivs da las distgargias fiscalas da medema maniera sco il chantun. Da la distgargia totala porta il chantun – cun 52 milliuns – stgars trais quarts. A las vischnancas tutga ina part da bundant in quart.

Avantatgs d'ina reducziun dal pe da taglia da 5 pertschient sco emprima mesira
In sbassament moderà dal pe da taglia chantunal da 5 pertschient per las persunas natiralas porscha sco emprim pass per realisar l'incumbensa Hohl acceptada avantatgs decisivs:

• Mesira il pli baud pussaivla cun in effect tant pli svelt;
• «Restituziun da meds finanzials chantunals pajadas memia bler» proporziunalmain a la chargia fiscala da fin ussa;
• Nagina grevezza fiscala da las vischnancas;
• Per il chantun finanzialmain supportabel e per 8 onns finanziabel da l'agen chapital a libra disposiziun;
• Nagina ulteriura restricziun da la libertad d'agir da la politica da finanzas;
• Effects profitabels acceptabels resguardond la finamira principala da l'incumbensa Hohl, distgargiar entradas suttamessas a la taglia da las famiglias e da las persunas cun activitad da gudogn;
• Pussaivladad per ina realisaziun cumbinada da l'incumbensa Hohl cun la revisiun successiva da la Lescha da taglia;
• Pussaivladad per ina participaziun tut en tut commensurada da las vischnancas a las distgargias fiscalas;
• Tut en tut distgargia fiscala considerabla per las persunas natiralas.

D'ina reducziun dal pe da taglia da passa 5 pertschient vegn scusseglià categoricamain. L'incumbensa Hohl na duai betg mo vegnir realisada cun ina reducziun dal pe da taglia. La libertad d'agir da la politica da finanzas dal chantun per distgargias fiscalas è limitada. Ils surplis da quint dals ultims onns n'èn betg persistents. Latiers han en spezial contribuì las suandantas trais funtaunas d'entradas: las autas distribuziuns dal gudogn da la BNS (2021 e 2022 mintgamai 92 miu.), auts pajaments da la gulivaziun da resursas tras la Gulivaziun da finanzas naziunala (NGF; dapi l'onn 2017 mintgamai var 90 miu. sur il nivel ch'ins po spetgar a partir da l'onn 2026) e taglias sin il gudogn tras la vendita da bains immobigliars da record (ca. 40 miu. sur la media da blers onns). La planisaziun da las finanzas preschenta per ils onns 2025 fin 2027 – betg surprendentamain – deficits da record fin sur 150 milliuns. Ina reducziun dal pe da taglia pli auta sa laschass tegnair mo paucs onns ed er mo anc per part finanziar or da l'agen chapital libramain disponibel. Ella na permettess uschia betg pli ina revisiun da la Lescha da taglia cun in levgiament fiscal sistematic da las entradas da las famiglias e da las persunas cun activitad da gudogn en il chantun.

Infurmaziuns:

Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 13.30 fin las 15.00), e‑mail Martin.Buehler@dfg.gr.ch

Responsabladad: Regenza