La maioritad collectiva da las vuschs (e la collavuraziun strategica) dal chantun Grischun e dals dus fonds d'infrastructura d'energia che vegnan administrads da Swiss Life Asset Managers e dad UBS Asset Management, numnadamain il «UBS Clean Energy Infrastructure Switzerland 2 KmGK» ed il «Clean Energy Infrastructure Switzerland 3 KmGK» («Fonds svizzers d'infrastructura d'energia») cun sedia en Svizra en la Repower SA vegn realisada.

Il chantun Grischun sco er ils fonds d'infrastructura d'energia che vegnan administrads da Swiss Life Asset Managers e dad UBS Asset Management, possedan ensemen pli che 50 pertschient dals dretgs da votar da la Repower SA e vegnan ad unir quests dretgs da votar en il futur, sche las autoritads da concurrenza acceptan quest project. L'annunzia ch'è ussa vegnida fatga a las autoritads da concurrenza, è in ulteriur pass per realisar la collavuraziun strategica tranter il chantun Grischun ed ils dus fonds svizzers d'infrastructura d'energia areguard lur participaziun a l'interpresa d'energia dal Grischun.

Planisà engaschament a lunga vista
Grazia a sia posiziun en l'economia d'energia sco er grazia a sia muntada per l'economia publica e per la politica regiunala è la Repower SA ina interpresa grischuna impurtanta. Cun unir ils dretgs da votar ademplescha la Regenza il giavisch ch'il Cussegl grond aveva exprimì en il rom da las debattas davart la Strategia grischuna concernent la forza idraulica 2022-2050, numnadamain quel da rinforzar la posiziun dal chantun inclusiv da las vischnancas grischunas en l'acziunariat da la Repower e quai en il senn d'ina finamira strategica.

En las societads d'infrastructura d'energia che vegnan administradas da Swiss Life Asset Managers e dad UBS Asset Management ed han lur sedia en Svizra, èn investidas exclusivamain cassas da pensiun svizras ed assicuranzas svizras cun in orizont d'investiziun a lunga vista. Quai accentuescha l'interess dals dus fonds per in engaschament a lunga vista en la Repower SA. La motivaziun dal chantun Grischun per il project sa basa cunzunt sin ina perspectiva a lunga vista, tenor la quala la Repower SA sco interpresa en ils conturns da la producziun d'electricitad cun energias regenerablas e ses grond potenzial per la producziun d'electricitad dal Grischun ha tant ina ferma impurtanza per l'economia publica sco er ina impurtanza extraordinaria per l'economia da finanzas. A medem temp vulan las partidas da la cunvegna mantegnair ina relaziun amicabla cun las Ovras electricas dal chantun Turitg (EKZ), la terza partida d'acziunaris.

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 01 (cuntanschibla da las 11.00 fin las 12.00), e‑mail Carmelia.Maissen@diem.gr.ch
• Cusseglier guvernativ Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch

Responsabladad: Regenza