Per rinforzar la compliance e l'integritad da las collavuraturas e dals collavuraturs è vegnida stgaffida – cun la revisiun parziala da la Lescha dal persunal – la basa per endrizzar in Post independent per l'annunzia d'incunvegnientschas en il sectur dal persunal. Suenter che la Regenza grischuna ha designà l'avust il Post per l'annunzia d'incunvegnientschas, èn las lavurs d'installaziun respectivas ussa vegnidas terminadas. A partir d'immediat stat il Post per l'annunzia d'incunvegnientschas a disposiziun per las collavuraturas ed ils collavuraturs da l'administraziun chantunala, da las dretgiras e dals instituts chantunals autonoms (cun excepziun da la Banca Chantunala Grischuna).

Ils 22 d'avust 2023 ha la Regenza grischuna designà la firma IntegrityPlus SA cun sedia a Turitg sco Post independent per l'annunzia d'incunvegnientschas en il sectur dal persunal. Las lavurs d'installaziun per il Post d'annunzia independent èn ussa terminadas. Las collavuraturas ed ils collavuraturs ch'èn suttamess a la Lescha dal persunal pon annunziar incunvegnientschas al plaz da lavur u en il manaschi, sco per exempel violaziuns da l'integritad persunala al plaz da lavur u incunvegnientschas da manaschi, da nov al Post d'annunzia independent. Sin giavisch pon las annunzias vegnir fatgas en moda anonima. En quest cas vegn l'anonimitad da las collavuraturas e dals collavuraturs garantida durant l'entir process d'annunzia e da scleriment. I dastgan vegnir annunziadas incunvegnientschas, sche las collavuraturas ed ils collavuraturs pertutgads èn – per motivs objectivs – da l'avis, che talas sajan vairas (q.v.d. «en buna fai») e sche l'annunzia vegn fatga – bain chapì – en l'interess da la patruna u dal patrun, pia betg ord spir agen interess (q.v.d. «onestamain»).

Entrar en contact – co?
Las collavuraturas ed ils collavuraturs han la pussaivladad da s'adressar al Post d'annunzia independent sur la plattafurma online segira «IntegrityLine». Alternativamain po in'annunzia er vegnir fatga per telefon, per posta u per e-mail. Tut las pussaivladads d'entrar en contact chattan ins sin la pagina d'internet da l'Uffizi da persunal dal Grischun. La plattafurma online «IntegrityLine» stat a disposiziun di e notg durant 7 dis l'emna. Ils termins da cussegliaziun persunals cun las cussegliadras ed ils cussegliaders dad IntegrityPlus han per regla lieu durant las uras da biro.

Entrar en contact – cun tgi?
Tut las annunzias che entran, vegnan repartidas ed elavuradas da las cussegliadras e dals cussegliaders dad IntegrityPlus. Las cussegliadras ed ils cussegliaders èn persunas spezialisadas scoladas da las disciplinas dretg, lavur sociala e pedagogia sociala. Ellas ed els garanteschan l'elavuraziun independenta ed autonoma da las annunzias, quai senza stuair observar instrucziuns.

Il Post da cussegliaziun psicologica vertent resta en funcziun
Il Post da cussegliaziun psicologica, ch'è etablì dapi decennis e che vegn manà en collavuraziun cun ils Servetschs psichiatrics dal Grischun, stat a disposiziun er vinavant a las collavuraturas ed als collavuraturs da l'administraziun chantunala, da las dretgiras e dals instituts autonoms chantunals. Las indicaziuns da contact per il team da cussegliaziun chattan ins medemamain sin la pagina d'internet da l'Uffizi da persunal dal Grischun.

Infurmaziuns:

Roger Danuser, manader a. i. da l'Uffizi da persunal dal Grischun, tel. +41 81 257 32 45, e‑mail Roger.Danuser@pa.gr.ch

Responsabladad: Uffizi da persunal