La Regenza ha approvà il project «Meglieraziun generala da Veulden, part Guaud» da la vischnanca da Tumleastga ed ha deliberà ina contribuziun chantunala da maximalmain 2 016 000.

Ensemen cun la part Agricultura da la meglieraziun generala ha il project l'intent da meglierar las cundiziuns da cultivaziun da l'agricultura e da la selvicultura. Per quest intent vegnan adattadas las vias champestras existentas als basegns actuals, quai cun la finamira da garantir access moderns e segirs. Tras l'adattaziun resp. la renovaziun da l'avertura dal guaud existenta duain vegnir meglierads ils transports da laina e la cultivaziun dal guaud. Analogamain a las bleras vias champestras agriculas vegnan las ladezzas da las vias forestalas schlargiadas a 3 meters, quai cun ina chinetta da 0,5 meters da la vart da la val e cun ina chinetta da 0,35 meters da la vart da la muntogna. Ils trassés da las vias existentas na vegnan betg midads.
L'execuziun dal project forestal dura 10 onns. Ils custs totals vegnan calculads cun circa 3,1 milliuns francs. La part Agricultura dal project da la meglieraziun generala da Veulden vegn approvada il medem mument tras il Departament d'economia publica e fatgs socials.

 

La Regenza ha prendì posiziun tar la consultaziun da la Cumissiun federala per traffic e telecommunicaziun concernent ina midada da la Lescha da posta. La cumissiun propona l'instrument cumprovà da promover indirectamain la pressa (taxas da consegna reducidas).

Ultra da l'augment da la contribuziun per la consegna quotidiana beneventa la Regenza en spezial il fatg, che l'intent d'utilisaziun dal sustegn è vegnì cumplettà cun la distribuziun da la pressa locala e regiunala a bun'ura. Questa promoziun indirecta da la pressa, ch'è limitada a titels cun in'ediziun da maximalmain 40 000 exemplars, ha ina impurtanza centrala per la cuntrada da pressa locala e regiunala.

Ord vista dal chantun Grischun cun sias trais regiuns linguisticas ademplescha la pressa regiunala e locala ina funcziun impurtanta. La democrazia viva da la diversitad da las opiniuns sco er d'ina populaziun infurmada. En vista a quests fatgs beneventa la Regenza las mesiras previsas a favur da la pressa regiunala e locala.

Consultaziun da la Cumissiun federala per traffic e telecommunicaziun