La Lescha davart l'administraziun digitala (LAD) ch'il Cussegl grond ha concludì ils 16 d'october 2023 entra en vigur il 1. d'avrigl 2024. Il termin da referendum è scadì ils 23 da schaner 2024. Entaifer quest termin n'èn vegnids inoltrads nagins referendums. La LAD stgaffescha las basas legalas per la digitalisaziun da process administrativs e da servetschs da basa (per exempel in portal chantunal dad e-government) sco er per la correspundenza giuridica electronica en proceduras administrativas.

Plinavant ha la Regenza approvà la revisiun totala da l'Ordinaziun davart il e-conto (OECo). Gia avant che relaschar la LAD èn vegnidas creadas las basas legalas per l'utilisaziun d'in e-conto cuminaivel ed interdisciplinar en l'Ordinaziun davart il e-conto. Cun prender en funcziun il portal dad e-government suenter l'entrada en vigur da la LAD vegn il e-conto extendì ulteriuramain ed integrà en quest portal. Intginas regulaziuns da la OECo pertutgant il e-conto vegnan surpigliadas confurm al senn sin il stgalim da norma superiur, la LAD. Autras disposiziuns vegnan a restar sin il stgalim da l'ordinaziun. Per quest motiv subescha la OECo ina revisiun totala sin il termin da l'entrada en vigur da la LAD e vegn a restar sco ordinaziun executiva. En il rom da la revisiun vegn il titel da l'Ordinaziun davart il e-conto adattà en «Ordinaziun tar la Lescha davart l'administraziun digitala (OLAD)», quai per specifitgar che l'ordinaziun cuntegna las disposiziuns executivas tar la LAD.