In onn suenter la votaziun dal pievel ha l'Uffizi chantunal da construcziun auta inoltrà ils 12 da mars 2024 a la citad da Cuira la dumonda da construcziun per il nov Center da scola auta spezialisada dal Grischun. Cun in nov edifizi persistent duain vegnir stgaffidas a la Pulvermühle a Cuira infrastructuras che permettan da studegiar e da perscrutar en moda prospectiva. L'avertura è previsa per l'onn 2028. «Cun inoltrar la dumonda da construcziun per il Center da scola auta spezialisada avain nus cuntanschì in ulteriur pass impurtant», di Andreas Kohne, architect chantunal. L'Uffizi chantunal da construcziun auta cumpetent ha inoltrà tut ils plans e documents en moda digitala a la citad da Cuira. Quests plans e documents vegnan ussa controllads en il rom da la procedura per la permissiun da construcziun. L'Uffizi da construcziun auta quinta cun ina decisiun da la citad en il decurs da la stad. In ulteriur term è planisà per la fin da l'atun 2024 cun l'emprima badigliada. Uschia vegn lantschà il cumenzament uffizial da la construcziun dal Center da scola auta spezialisada (CSASGR). Sche tut va tenor plan, vegn cumenzà l'onn 2028 cun il manaschi en il nov CSASGR. Gia la primavaira 2024 cumenzan las lavurs da demontascha dals edifizis existents sin l'areal Pulvermühle. Actualmain vegnan las studentas ed ils students da la Scola auta spezialisada instruids en tschintg lieus en nov edifizis. Tras il nov edifizi vegnan l'instrucziun e la perscrutaziun unidas en in lieu sin il nov campus per las studentas ed ils students sco er per las collavuraturas ed ils collavuraturs. Film davart la procuraziun da laina locala Realisà vegn il nov edifizi tranter auter er cun materials indigens. Uschia vegn ina part da la laina da construcziun per il Center da scola auta spezialisada procurada da l'economia forestala locala. En il rom dal tagl da laina regular han ins terrà durant las ultimas emnas ils bostgs correspundents en 34 vischnancas grischunas. En il chantun han ussa otg resgias l'incumbensa da tagliar or da la laina radunda travs che vegnan suenter montadas sco travs da lain massiv en ils palantschieus sura dal plaunterren e dals plauns sura. Per che la laina dals guauds dal Grischun possia vegnir duvrada en il nov edifizi, ha il process per procurar laina stuì vegnir organisà en moda anticipada. Quests pass per procurar laina vegnan documentads cun films. L'emprima part davart la procuraziun da laina locala po vegnir guardada a partir d'immediat. Visualisaziuns/fotografias: FHZGR Atrium Ost | FHZGR Atrium West | FHZGR Foyer | FHZGR Holz 1 | FHZGR Holz 2 | FHZGR Holz 3 © Giuliani Hönger Architekten Infurmaziuns: Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 13.00 fin las 16.00), e‑mail Andreas.Kohne@hba.gr.ch Responsabladad: Uffizi da construcziun auta Infurmaziuns cumplementaras davart il nov Center da scola auta spezialisada: Ils 12 da mars 2023 ha il pievel grischun approvà cun passa 83 pertschient il project «Realisaziun dal Center da scola auta spezialisada dal Grischun». Il project da votaziun per quest project cumpigliava in credit d'impegn da 151 milliuns francs. Las investiziuns totalas per il project duain importar var 178 milliuns francs. Il nov Center da scola auta spezialisada duai porscher plazza per var 2000 studentas e students sco er per 300 collavuraturas e collavuraturs che sa deditgeschan sin il nov campus a la Pulvermühle a Cuira a la perscrutaziun ed a l'instrucziun. La Scola auta spezialisada dal Grischun è l'otgavla scola auta spezialisada da dretg public independenta en Svizra. Oz è la Scola auta spezialisada repartida sin tschintg lieus en nov edifizis entaifer la citad da Cuira. Realisà vegn il nov edifizi dal team general da planisaziun cun il project «PARTENARIS» sut la direcziun dal biro d'architectura Giuliani Hönger Architekten da Turitg. L'onn 2021 ha il biro gudagnà la concurrenza da projects.