Dals 25 da november fin ils 10 da december 2024 metta il Grischun puspè in signal cunter la violenza a chasa. Ils dis d'acziun da quest onn mettan il focus sin il tema «Vias or da la violenza». Il chantun appellescha la populaziun, organisaziuns ed instituziuns da participar e po sustegnair finanzialmain occurrenzas u acziuns.

Co chattan persunas ch'èn pertutgadas da violenza sustegn? Tge purschidas d'agid datti per persunas ch'èn violentas e che vulan chalar cun quai? Tge rolla giogan spezialistas e spezialists, l'ambient social e la societad en sia totalitad per sustegnair persunas sin lur via en ina vita senza violenza?

Vias or da la violenza
En il chantun Grischun datti numerusas purschidas d'agid per persunas pertutgadas. Il tema central «Vias or da la violenza» duai gidar a far pli enconuschentas questas purschidas ed a las duvrar dapli. Savens taschan las persunas pertutgadas per tema u per vargugna. Er tgi che suppona u observa violenza a chasa sa senta savens pers. Ils Dis d'acziun 2024 porschan ina plattafurma per sensibilisar e per dialogar avertamain.

La violenza a chasa ha bleras fassettas e n'enconuscha nagins cunfins, ni en reguard geografic e cultural ni areguard ils conturns socials, las furmas e la dimensiun. Il sectur da la violenza a chasa cumpiglia tut las acziuns da violenza corporala, sexuala, psichica u economica, e quai entaifer la famiglia u tranter conjugals e partenaris anteriurs u actuals.

Purschidas d'agid ed ulteriuras infurmaziuns èn disponiblas sin www.violenza-a-chasa.gr.ch.

Il chantun sustegna e finanziescha
Ils Dis d'acziun cunter violenza a chasa dals 25 da november fin ils 10 da december vegnan accordads cun la campagna «16 dis cunter violenza envers dunnas» e cun ils «Orange Days». Il Post da coordinaziun Violenza a chasa è responsabel per ils dis d'acziun en il Grischun. Il chantun po sustegnair finanzialmain occurrenzas ed acziuns concernent il tema da la violenza a chasa en general sco er concernent il tema central «Vias or da la violenza», che han lieu durant ils dis d'acziun en il Grischun. Ultra da quai fa el attent a las occurrenzas e metta a disposiziun material da campagna als organisaturs.

Annunzias e dumondas correspundentas ston vegnir inoltradas fin ils 9 d'avust 2024. Ils formulars pon vegnir chargiads giu da la pagina d'internet dal Post da coordinaziun.

Fotografia agiuntada:

La campagna da sensibilisaziun «Toxic Love», ch'è stada visibla en il rom dals Dis d'acziun 2023 en l'entir chantun, cuntinuescha er l'onn 2024.

Infurmaziuns:

Madlaina Baselgia, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11, e‑mail Madlaina.Baselgia@soa.gr.ch

Occurrenza da colliaziun:

Mesemna, ils 12 da zercladur 2024 envida il Post da coordinaziun Violenza a chasa da las 16.30 fin las 18.00 en la ibW Scola spezialisada superiura da la Svizra Sidorientala ad in'occurrenza da colliaziun. I vegnan salvads referats d'input davart il tema da la violenza a chasa, davart las purschidas d'agid existentas sco er pertutgant la realisaziun dals dis d'acziun. A chaschun dal apero successiv èsi pussaivel da tgirar in barat individual cun spezialistas e spezialists e cun autras organisaturas ed organisaturs. Las persunas e las organisaziuns interessadas èn envidadas cordialmain da s'annunziar per telefon u per e-mail fin venderdi, ils 3 da matg 2024: Post da coordinaziun Violenza a chasa, e‑mail haeusliche.gewalt@soa.gr.ch / tel. +41 81 257 26 11.

Responsabladad: Uffizi dal servetsch social