La Regenza ha examinà il rapport che Ernst & Young ha fatg per incumbensa dal cussegl da banca da la Banca Chantunala Grischuna. Ella ha prendì enconuschientscha ch'il cumportament examinà da las persunas pertutgadas è stà confurm a l'urden. Sin fundament dal rapport vesa ella però in basegn d'agir en connex cun la governance.
Durant ils ultims mais è la Regenza sa fatschentada pliras giadas cun las dumondas avertas en connex cun la Banca Chantunala Grischuna (BCG). Ils 11 da mars 2024 ha ella plinavant sa laschà infurmar dal cussegl da banca e da la direcziun da la BCG, quai a chaschun da lur inscunter annual.
La saira dals 16 d'avrigl 2024 ha la Regenza survegnì il rapport che Ernst & Young (EY) ha fatg per incumbensa dal cussegl da banca. A chaschun d'ina sesida extraordinaria ha ella discutà ils 19 d'avrigl 2024 il rapport e definì l'ulteriur proceder.
Basegn d'agir tar la governance
La Regenza prenda enconuschientscha, che EY vegn a la conclusiun en ses rapport, ch'il cumportament examinà da las persunas participadas è stà confurm a l'urden. Sin fundament dal rapport vesa ella dentant in basegn d'agir en connex cun la governance, particularmain cun las obligaziuns da transparenza e d'annunzia. Per quest intent vul la Regenza sa barattar cun il cussegl da banca.
Independentamain dals eveniments actuals è la Regenza obligada tenor lescha da controllar permanentamain las basas da la BCG areguard lur actualitad e lur efficacitad. Tar questas basas tutgan la Lescha davart la Banca chantunala grischuna, las finamiras da proprietari ed il concept da surveglianza da la Regenza. La Regenza ha perquai decidì gia ils 9 d'avrigl 2024 d'elavurar fin l'onn 2025 in'analisa cumplessiva da la situaziun.
La BCG è ina banca fitg prosperaivla e segira. La finamira suprema da la Regenza è quella, che la BCG possia cuntinuar en il futur, uschè ferma sco ella è.
Infurmaziuns:
Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 05 (cuntanschibel da las 12.30 fin las 13.30), e‑mail Martin.Buehler@dfg.gr.ch
Responsabladad: Regenza