La Regenza ha deliberà ina contribuziun chantunala per sviluppar vinavant en moda persistenta la marca graubünden. Plinavant ha ella decidì da metter a disposiziun a Landquart ina surfatscha en il dretg da construcziun per realisar il «Biochar Circle Switzerland».
La marca graubünden s'oblighescha a la persistenza
En il rom da la Nova politica regiunala da la Confederaziun (NPR) ha la Regenza concedì ina contribuziun chantunala da totalmain 660 000 francs al secretariat da la marca graubünden per tut en tut 3 onns. La contribuziun NPR per il project «Program da realisaziun Marca graubünden persistenta» vegn pajada mintgamai per la mesadad da la Confederaziun e dal chantun.
Dapi passa 20 onns sa posiziunescha il chantun Grischun cun la marca graubünden. Sco «metropola natirala» sa vesa il Grischun sco lieu innovativ e multifar per viver e per lavurar. Per sviluppar vinavant la marca è cumpetent il secretariat da la marca graubünden. Ensemen cun var 20 partenaris da differents secturs da l'economia ha el elavurà il «Program da realisaziun Marca graubünden persistenta».
La finamira dal project è quella da rinforzar a lunga vista la marca. Per quest intent duain las titularas ed ils titulars da la licenza s'obligar a la persistenza, quai cun approfundar e cun etablir autenticamain las valurs centralas da la marca cun las dimensiuns da la persistenza (dimensiun sociala, ecologica ed economica).
En il rom da la Nova politica regiunala da la Confederaziun (NPR) ha la Regenza concedì ina contribuziun chantunala da totalmain 660 000 francs al secretariat da la marca graubünden per tut en tut 3 onns. La contribuziun NPR per il project «Program da realisaziun Marca graubünden persistenta» vegn pajada mintgamai per la mesadad da la Confederaziun e dal chantun.
La Regenza metta a disposiziun ina parcella per «Biochar Circle Switzerland»
Il chantun Grischun metta a disposiziun ina surfatscha da 7600 meters quadrat a Landquart per realisar la sedia principala ed il lieu da producziun da la Inkoh SA. La parcella vegn surdada per 60 onns en il dretg da construcziun a la Kies und Beton SA Schrau, quai per 58 632 francs per onn. La Inkoh SA appartegna a la gruppa Zindel United Holding SA cun sedia a Maiavilla. Tut ils contracts da dretg da construcziun e da concessiun vegnan concludids sur la Kies und Beton SA Schrau.
La Inkoh SA è s'annunziada per questa surfatscha, ch'è attribuida da nov a la zona d'industria, quai per realisar il «Biochar Circle Switzerland». Tal duai daventar la sedia principala ed il lieu da producziun da la Inkoh SA ed a medem temp in project exemplaric en il sectur dal carbon biogen en Svizra ed en l'Europa. La Inkoh SA è s'etablida ils ultims onns e dominescha ussa la perscrutaziun e la producziun da biocharvun d'auta qualitad en Svizra ed en l'exteriur vischin. La procedura da la pirolisa applitgada è ina da las tecnologias d'emissiun negativa ch'è renconuschida da la scienza e fa actualmain part da las metodas las pli efficazias per allontanar il CO₂ da l'atmosfera. Cun realisar il project da la Inkoh SA a Landquart survegn il chantun Grischun ina impurtanta partenaria en il sectur da Clean-Tech sco er ina producenta signifitganta da Biochar Carbon Removal cun certificat da cumpensaziun da CO₂ made en il Grischun.
Il chantun Grischun metta a disposiziun ina surfatscha da 7600 meters quadrat a Landquart per realisar la sedia principala ed il lieu da producziun da la Inkoh SA. La parcella vegn surdada per 60 onns en il dretg da construcziun a la Kies und Beton SA Schrau, quai per 58 632 francs per onn.
Tgira dal guaud da protecziun a Breil daventa pli effizienta e persistenta
La Regenza ha approvà il project «Avertura dal guaud Artugl – Plaun da Plaids» da la vischnanca da Breil e garantì ina contribuziun chantunala da maximalmain 1,38 milliuns francs per quest intent.
Il project prevesa da renovar e d'adattar als basegns actuals l'avertura dal guaud existenta en ils territoris da guaud Artugl – Plaun da Plaids, ch'èn situads al vest dal vitg. Plinavant vegni pussibilità da mantegnair effizientamain e persistentamain il guaud da protecziun. Ultra da quai ha il project en mira da reducir ils sgols cun helicopter per la racolta da laina e d'obtegnair in meglier access per vehichels ed apparats stizzafieu moderns ed effizients. Quai duai vegnir realisà cun construir e cun meglierar l'avertura da basa minimala per il diever da sistems da racolta da laina moderns ed effizients. L'execuziun dal project dura 3 onns. Ils custs totals vegnan calculads cun 2 milliuns francs.
La Regenza ha approvà il project «Avertura dal guaud Artugl – Plaun da Plaids» da la vischnanca da Breil e garantì ina contribuziun chantunala da maximalmain 1,38 milliuns francs per quest intent.
