Durant ils dis cun bler traffic sa furman adina puspè colonnas da vehichels stagnantas en il stretg center dal vitg da Sta. Maria en Val Müstair. Ussa prevesa l'Uffizi da construcziun bassa d'optimar la regulaziun dal traffic durant ils dis extrems. Quai duai procurar per ina distgargia ed impedir las colonnas.

Las fins d'emna dals 22 da zercladur fin e cun ils 18 d'avust 2024 reguleschan persunas il traffic a Sta. Maria. L'Uffizi da construcziun bassa dal Grischun (UCB) emprova uschia da meglierar la situaziun per las abitantas ed ils abitants dal vitg sco er per las participantas ed ils participants dal traffic. La finamira da la mesira è en emprima lingia d'impedir ch'ils vehichels s'encugnian e furmian colonnas en il center dal vitg.

Zona da spetga ordaifer il center dal vitg
Cun dosar sistematicamain il traffic vul il UCB mantegnair in traffic fluid tras il center dal vitg. Per quest intent vegn endrizzà mintgamai in post ch'è occupà cun persunal, ordaifer il vitg da Sta. Maria en direcziun da Valchava ed en direcziun da Müstair. Grazia a quest dosagi ordaifer il vitg na duain las abitantas ed ils abitants betg mo vegnir liberads da las colonnas en il vitg, mabain er da las emissiuns excessivas, sco canera e svapurs. Ultra da quai po uschia er vegnir stabilisà meglier l'urari da las colliaziuns d'auto da posta che furman la purschida dal traffic public en la Val Müstair. Ulteriuras collavuraturas e collavuraturs dal servetsch da traffic èn postads en il center dal vitg, tranter auter a la sbuccada da la via da l'Umbrail. En cas da basegn pon quels scumandar a curta vista a vehichels da passar tras il vitg, sch'in collaps dal traffic en il center duess smanatschar.

Monitoring permanent e pussaivladads da reagir en moda flexibla
Per entant èsi planisà da realisar las mesiras durant las fins d'emna menziunadas, quai mintgamai da las 10.00 fin las 17.00. Il UCB vegn a persequitar intensivamain l'effect da questas mesiras e – sche necessari – ad adattar il concept en tscherts puncts.

Fotografia agiuntada:

En il stretg center dal vitg da Sta. Maria sa furman adina puspè colonnas durant ils dis cun bler traffic.

Infurmaziuns:

Roger Stäubli, schef Construcziun da vias, Uffizi da construcziun bassa, tel. +41 81 257 38 42 (cuntanschibel da las 09.00 fin las 11.00), e‑mail Roger.Staeubli@tba.gr.ch