Il favrer 2024 ha il Departament d'educaziun, cultura e protecziun da l'ambient fatg per l'emprima giada in'enquista da tut las collavuraturas ed ils collavuraturs ed envidà ellas ed els da s'exprimer davart lur situaziun da lavur. Cun quasi 73 pertschient è la procentuala da respostas stada auta e represchentativa. Ils resultats èn legraivels. En spezial vegn la cuntentientscha a la lavur valitada sco gronda e la prontezza a la prestaziun sco fitg gronda. La finamira da l'enquista è stada quella d'eruir – ultra da las fermezzas – er ils potenzials da meglieraziun. Quels sa mussan en connex cun la meglra concepziun dals process da lavur sco er cun ina repartiziun pli gista da la chargia da lavur. En in proxim pass vegnan quests temas analisads pli profundamain en ils singuls uffizis ed ins vegn ad instradar process da meglieraziun cun cleras finamiras.

Il favrer 2024 ha il Departament d'educaziun, cultura e protecziun da l'ambient (DECA) questiunà detagliadamain sias collavuraturas e ses collavuraturs davart lur situaziun da lavur actuala. L'enquista n'ha betg cumpiglià las persunas d'instrucziun da la Scola chantunala grischuna, perquai che la scola ha gia fatg in'atgna enquista, ed er betg las collavuraturas ed ils collavuraturs da l'atelier d'emprendissadi per la creaziun da vestgadira che vegn serrà quest onn. Cun agid da l'enquista duessan vegnir vesidas las fermezzas ed identifitgads ils potenzials da meglieraziun. La realisaziun e l'evaluaziun da l'enquista èn vegnidas fatgas da la firma independenta Empiricon SA.

Gronda prontezza a la prestaziun e cuntentientscha
75 pertschient da las collavuraturas e dals collavuraturs dal DECA èn fitg cuntents cun lur lavur; 19 pertschient inditgeschan d'esser plitost cuntents. Il commitment (sentiment d'appartegnientscha envers il departament e ses uffizis) mussa la prontezza da las collavuraturas e dals collavuraturs a la prestaziun, lur fidaivladad envers il patrun e lur identificaziun cun l'agen uffizi. Bunamain tut las collavuraturas ed ils collavuraturs inditgeschan, ch'els s'engaschian gugent plainamain per lur lavur. La prontezza a la prestaziun vegn valitada cun 92 da 100 puncts sco fitg gronda, e quai independentamain da la vegliadetgna da vita e da professiun e sur tut ils stgalims da funcziun.

En spezial inditgeschan las collavuraturas ed ils collavuraturs, ch'els prestian ina contribuziun essenziala per cuntanscher las finamiras ed els han gronda fidanza en lur superiuras e superiurs directs ed en la direcziun da l'uffizi. Correspundentamain sa legra il president da la Regenza e schef dal DECA, Jon Domenic Parolini, dals resultats: «Collavuraturas e collavuraturs ch'èn motivads e cuntents èn per mintga organisaziun la via al success. Il grond engaschament, la ferma colliaziun cun l'uffizi respectiv e cun il departament stim jau fitg. Jau engraziel a tut las collavuraturas e tut ils collavuraturs per lur contribuziun e ma legrel ch'els profitan da lur pussaivladads da cundecider».

Buna cumpatibilitad da la lavur cun la vita privata
La lavur pussibilitescha a las collavuraturas ed als collavuraturs ina buna cumpatibilitad da la lavur cun la vita privata. Per las bleras collavuraturas e collavuraturs correspunda la reglamentaziun dal temp da lavur als agens basegns. Var 47 pertschient da las persunas dumandadas fan diever da la pussaivladad da lavurar davent da chasa. Ina gronda part da las collavuraturas e dals collavuraturs che lavuran per part davent da chasa e che liquideschan là lur incumbensas, po lavurar gist uschè bain sco al lieu da lavur. Els inditgeschan d'avair avunda pussaivladads da sa barattar cun las ulteriuras collavuraturas ed ils ulteriurs collavuraturs.

Identifitgà process da lavur e pretensiuns a la lavur sco champs tematics
Il sectur process da lavur/collavuraziun vegn valità en moda differenta. D'ina vart inditgeschan las collavuraturas ed ils collavuraturs per gronda part, ch'ils process sajan da princip concepids cleramain. Da l'autra vart vegn il funcziunament dals process da lavur senza disturbis valità in pau pli bass. Er ina valitaziun in pau pli bassa datti tar il champ tematic pretensiuns a la lavur. Da princip èn las collavuraturas ed ils collavuraturs da l'opiniun, ch'els hajan avunda temp per liquidar lur incumbensas en la qualitad pretendida. En il medem champ tematic giuditgeschan els percunter in pau pli bass la repartiziun gista da la chargia da lavur. Cumbain che la gronda part da las respostas en connex cun il tema salarisaziun sa chatta tut en tut entaifer il sectur mesaun fin positiv, vegnan las dumondas davart il salari gist e davart l'attractivitad da las prestaziuns accessoricas valitadas pli bassas ch'ils auters champs tematics da l'enquista.

Mesiras ed enconuschientschas
Ils resultats ch'èn ussa avant maun èn ina savida directiva per pudair elavurar en in process participativ meglieraziuns e mesiras concretas per il DECA. «Jau giavisch che tut las persunas da cader sin tut ils stgalims nizzegian la schanza ed introduceschian mesiras adattadas che rinforzan ulteriuramain la situaziun e l'ambient da lavur da lur collavuraturas e collavuraturs. Ensemen pudain nus cuntanscher bler. L'engaschament da tuttas e tuts mussa, che nus essan sin la dretga via», declera il president da la Regenza Jon Domenic Parolini.

Agiunta:

Fegl d'infurmaziun Empiricon

Infurmaziuns:

Cusseglier guvernativ dr. Jon Domenic Parolini, tel. +41 81 257 27 01 (cuntanschibel da las 11.00 fin las 11.30), e‑mail Jondomenic.Parolini@ekud.gr.ch