Cun l'avertura d'ina professura per allergologia ed asma vegn l'Institut svizzer da retschertgas davart allergias ed asma (ISRA) a Tavau rinforzà signifitgantamain. Ils 21 da zercladur 2024 han represchentants da la Regenza grischuna e la direcziun da l'Universitad da Turitg (UZH) publitgà cuminaivlamain ina cunvegna. Quest pass è in cler confess per rinforzar l'allergologia ed il ISRA en il Grischun sco lieu da perscrutaziun.

Ils secturs perscrutaziun, furmaziun ed innovaziun èn da gronda impurtanza per la cumpetitivitad dal chantun Grischun. Els gidan a diversifitgar la structura economica dal Grischun, a stgaffir ulteriuras plazzas da lavur interessantas ed a posiziunar il chantun sco lieu da viver e da lavurar attractiv.

Questa impurtanza vegn suttastritgada cun il punct central da svilup 9.1 «Sviluppar vinavant ils instituts da perscrutaziun en il Grischun» e persequitada vinavant consequentamain en il rom da la strategia integrada da perscrutaziun, da furmaziun e d'innovaziun sco er dals puncts centrals dal program da la Regenza.

Il president da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, che ha suttascrit la cunvegna ensemen cun il cusseglier guvernativ Marcus Caduff, schef dal Departament d'economia publica e fatgs socials, s'exprima sco suonda davart la nova professura a Tavau: «Questa cunvegna tranter il chantun Grischun e l'Universitad da Turitg è in term decisiv dal partenadi surchantunal per rinforzar il Grischun sco lieu da perscrutaziun.»

Rinforzar il partenadi existent
Cun la cunvegna vegn la professura per allergologia ed asma integrada da nov en la strategia da la facultad da medischina da la UZH, uschia ch'ella daventa ina professura stabla. «Tematicamain è questa professura fitg impurtanta. Ella s'integrescha perfetgamain en la strategia da la UZH», di il rectur da la UZH prof. dr. Michael Schaepman. «Cun ella pudain nus rinforzar en moda persistenta nossa dominanza sin il champ da l'allergologia sco er il ISRA a Tavau.»

Quai procura per ina buna situaziun da partenza per ulteriuras investiziuns. Gia l'onn 2024 ha il chantun Grischun auzà la contribuziun chantunala da 250 000 francs sin tut en tut 780 000 francs. Tenor la revisiun parziala da la Lescha chantunala davart las scolas autas e la perscrutaziun po il chantun pajar fin 80 pertschient da la contribuziun federala a favur da la finanziaziun fundamentala d'instituziuns da perscrutaziun d'impurtanza naziunala tenor la legislaziun federala. La contribuziun federala 2024 al ISRA importa 1,46 milliuns francs. Plinavant èsi previs en quest connex d'eventualmain sviluppar vinavant il ISRA tras ina cuntinuaziun da la professura extraordinaria per proteomica da precisiun. A medem temp planisescha l'Universitad da Turitg da proveder la professura correspundentamain. Uschia vegnan segiradas tschertas investiziuns ed a media vista er la creaziun da plazzas per persunal scientific ed administrativ-tecnic.

L'istorgia dal ISRA ha cumenzà l'onn 1905 cun sia fundaziun sco «Tuberculosis Research Institute Davos». Dapi l'onn 1988 vegn l'instituziun designada sco «Swiss Institute of Allergy and Asthma Research (SIAF)». Sut il directur actual prof. dr. med. Cezmi Akdis è il ISRA sa sviluppà ad ina da las pli impurtantas instituziuns sin l'entir mund en il sectur da l'allergologia e da la perscrutaziun dad asma. Cun la cunvegna vegn ussa garantida la cuntinuaziun a pli lunga vista, e la professura daventa attractiva per candidaturas internaziunalas e da renum.

Center da perscrutaziun per la medischina translaziunala en planisaziun
La cunvegna tranter l'Universitad da Turitg ed il chantun Grischun per avrir ina professura è ina contribuziun essenziala per realisar la strategia chantunala d'innovaziun. Acturas ed acturs da la scienza, da la perscrutaziun e da l'economia en il chantun Grischun duain collavurar en l'avegnir pli stretg in cun l'auter per concentrar lur forzas e per far avanzar projects innovativs.

La finamira è quella da sviluppar en in proxim pass a Tavau in center da perscrutaziun unic d'impurtanza internaziunala per la medischina translaziunala. A lunga vista duai quest center gidar a reducir ils custs ed ad augmentar la qualitad en il sectur da la sanadad, quai tras ina medischina persunalisada che metta il focus sin ils organs da barriera sco la pel, il pulmun u la beglia. L'orientaziun tematica d'in tal center e l'infrastructura unica dattan impuls per cooperaziuns e per investiziuns secundaras tras partenaris externs da la scienza e da l'economia.

Fotografias agiuntadas:

A partir da las 12.00 stattan las fotografias da la conferenza da medias a disposiziun qua.

Infurmaziuns:

• President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 02 (cuntanschibel da las 15.30 fin las 16.00), e‑mail Jondomenic.Parolini@ekud.gr.ch
• Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (schef dal Departament d'economia publica e fatgs socials), e‑mail Marcus.Caduff@dvs.gr.ch
• Dr. Gion Lechmann, manader da l'Uffizi per la furmaziun media-superiura, tel. +41 81 257 35 71 (cuntanschibel da las 16.15 fin las 16.45), e‑mail Gion.Lechmann@ahb.gr.ch
• Reto Bleisch, manader da l'Uffizi per economia e turissem, tel. +41 81 257 23 77 (cuntanschibel da las 14.00 fin las 17.00), e‑mail Reto.Bleisch@awt.gr.ch

Responsabladad: Uffizi per la furmaziun media-superiura