La Regenza grischuna ha nominà Peter Vincenz sco nov manader dal Plantahof. El vegn a surpigliar questa funcziun il 1. da favrer 2025.

Peter Vincenz ha 49 onns ed è creschì si a Mustér, nua ch'el ha visità la scola primara ed il gimnasi a la scola claustrala. Suenter ses studi d'agronomia a la SPF Turitg ha el gia lavurà al Plantahof, quai tranter il 2001 e 2004 sco cussegliader agricul. Suenter ulteriuras staziuns en l'economia privata ed en la regiun Surselva, è el l'onn 2010 turnà tar il chantun en l'Uffizi d'agricultura e da geoinfurmaziun. A l'entschatta ha el manà là il ressort Fatgs da controlla. Il fanadur 2021 ha el surpiglià la direcziun da la partiziun Mesiras agriculas.

Peter Vincenz succeda a Peter Küchler che ha surprendì il settember 1999 il Plantahof sco directur e che va ils 31 da schaner 2025 en sia pensiun anticipada meritada, quai suenter esser stà passa 26 onns en servetsch tar il chantun.

Il Plantahof è in post da servetsch dal Departament d'economia publica e fatgs socials. El represchenta il center da cumpetenzas per la furmaziun e la cussegliaziun agricula en il chantun Grischun. Sia purschida cumpiglia la scola professiunala spezialisada d'agricultura, scolaziuns cuntinuantas, curs da perfecziunament e dietas sco er la cussegliaziun e l'intermediaziun da savida spezialisada a favur da l'agricultura e da l'economia d'alp dal Grischun. Per quest intent ha il Plantahof in agen bain puril en furma d'in manaschi d'emprova sco er in center da dietas cun internat e manaschi d'alimentaziun.

Fotografia agiuntada:

Infurmaziuns:

Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel da las 14.00 fin las 15.00), e‑mail Marcus.Caduff@dvs.gr.ch