En vista a la situaziun finanziala difficila dals ospitals grischuns vul la Regenza stgaffir ina basa giuridica che pussibilitescha al chantun da dar emprests als manaschis. Ina tala pussaivladad manca actualmain. La Regenza ha incumbensà il Departament da giustia, segirezza e sanadad d'elavurar la basa giuridica.

In provediment da la sanadad intact en las regiuns è la basa per ils abitadis decentrals en il chantun ed er in factur impurtant per il turissem. Tant il provediment da la sanadad decentral sco er il provediment central da la populaziun è dentant periclità en vista al svilup finanzial dals ospitals grischuns. La gronda part dals ospitals sto registrar pli e pli grondas perditas en il quint da gestiun (cash flow negativ) e n'è betg pli buna da finanziar las investiziuns necessarias per mantegnair e renovar las immobiglias, la tecnica medicinala sco er ils instruments ed apparats diagnostics.

En vista al fatg che la dignitad da credit manca, èsi praticamain exclus ch'ils ospitals pudessan emprestar chapital ester sin il martgà da chapital per garantir la liquiditad. Ils emprests han l'intent d'auzar la quota d'agen chapital dals ospitals grischuns, uschia ch'els duessan lura avair la pussaivladad d'emprestar daners sin il martgà da chapital sut cundiziuns acceptablas. Ils emprests duain vegnir concedids sut la cundiziun, ch'ils ospitals respectivs elavurian in plan da mesiras, per garantir ch'i resultia a curta fin a media vista in resultat da gestiun positiv cun marschas suffizientas.

La Regenza ha prendì posiziun tar in project da consultaziun dal Departament federal da l'intern (DFI) concernent la realisaziun e la finanziaziun da l'Iniziativa per ina 13avla renta da la AVS.

Il chantun Grischun è da l'avis che la cumpart da la Confederaziun a la finanziaziun da las expensas da la AVS na duai betg vegnir midada. Er suenter l'acceptaziun da l'Iniziativa per ina 13avla renta da la AVS duai questa cumpart importar 20,2 pertschient. Ord vista da la Regenza n'èsi betg inditgà, che la Confederaziun adosseschia questa cumpart a las consumentas ed als consuments (sur la taglia sin la plivalur) respectivamain a las persunas assicuradas ed als patruns (sur las contribuziuns da salari). Areguard la finanziaziun restanta per la cumpart da la AVS sustegna la Regenza in augment da la taglia sin la plivalur. D'ina vart vegn uschia la grevezza finanziala supplementara purtada da tut las consumentas ed ils consuments, pia er da las persunas che retiran prestaziuns da la AVS. Da l'autra vart poi vegnir desistì d'auzar las contribuziuns da salari da las persunas assicuradas e dals patruns. Uschia na vegnan ils custs da salari betg auzads ulteriuramain per las interpresas. En connex cun la finanziaziun dals custs supplementars a curta vista pervia da la 13avla renta da la AVS na dastgan ins betg emblidar, che la AVS vegn ad esser confruntada a media ed a lunga vista cun ulteriurs problems da finanziaziun structurals a partir dal 2030. Quels ston vegnir prendids per mauns e schliads svelt.

Consultaziuns dal Departament federal da l'intern

La Regenza ha approvà il project per la correcziun da l'En en la vischnanca da Zernez. Per quest intent ha ella garantì a la vischnanca ina contribuziun chantunala da maximalmain 255 000 francs tenor la Lescha davart la correcziun dals curs d'aua. Ultra da quai ha ella permess – tenor la cunvegna da program da la Nova gulivaziun da finanzas (NGF) – ina contribuziun federala da maximalmain 446 250 francs als custs totals dal project dad 1,275 milliuns francs.

L'avust 2023 hai dà grevas malauras en l'Engiadina, che han procurà per aua gronda en l'En. En il territori «Sosa» è la riva dretga da l'En vegnida lavada davent sin ina lunghezza da var 250 meters, in'autezza da fin 5 meters ed ina profunditad da 6 fin 8 meters. Questas erosiuns da la riva han tranter auter er donnegià la via d'access a la serenera e scuvert conducts d'electricitad e da telecommunicaziun sut terra. En il rom dal project duai vegnir construì in nov rempar da riva per proteger la serenera, las vias sco er ils conducts d'ovra. En quest connex èsi previs da proteger la riva cun in rempar dir da blocca da crappa, ch'è variabel e concepì en moda natirala e che vegn per part cuvrì cun terra, e quai cumbinà cun in rempar viv cun saleschs. Plinavant èn previsas mesiras per diriger il curs dal flum. Quellas duain gidar a meglierar las relaziuns dal curs da l'En en cas da deflussiuns bassas e mesaunas.

La Regenza ha approvà la revisiun parziala da la planisaziun locala che la vischnanca da Schluein aveva concludì ils 12 d'avrigl 2022. Uschia stgaffescha ella las premissas, per che la vischnanca da Schluein possia adattar la grondezza, la dimensiun e l'utilisaziun da las zonas da construcziun.

Tranter auter planisescha la vischnanca da reducir sia zona d'abitar, maschadada e dal center (ZAMC) per circa 1745 meters quadrat. Tut en tut vegnan las zonas da construcziun reducidas per circa 4175 meters quadrat. En il plan general da furmaziun èn vegnidas definidas novas categorias per edifizis prezius, determinads objects natirals e culturals supplementars sco er fixadas novas lingias da furmaziun per construir. En il plan da zonas Cuntrada èn plinavant vegnids integrads differents novs biotops, e biotops existents èn vegnids adattads. Ultra da quai è vegnida fatga ina revisiun parziala dal plan general d'avertura Traffic.

Comet Photoshopping ScRL, Dieter Enz