La Regenza approvescha la construcziun d'in implant fotovoltaic grond tras la Madrisa Solar SA en il Partenz. Ultra da quai approvescha ella in project da protecziun cunter crudadas da crappa en la Val Calanca.
Permissiun da l'implant fotovoltaic grond «Madrisa» a Claustra
La Regenza conceda la permissiun per la
construcziun d'in implant fotovoltaic grond tras la Madrisa Solar SA en il
Partenz. I sa tracta dal project «Madrisa» en la vischnanca da Claustra. Il
project sa basa sin l'art. 71a da la Lescha federala d'energia, l'uschenumnà
«Solarexpress». Quest artitgel è vegnì stgaffì dal Parlament federal l'atun 2022 cun la finamira da pudair realisar uschè svelt e nuncumplitgà sco
pussaivel implants fotovoltaics gronds autalpins.
Il project da la Madrisa Solar SA en il
territori «Züg» a Madrisa sin circa 2000 meters sur mar han las votantas ed ils
votants da la vischnanca da Claustra acceptà a chaschun da la radunanza
communala dals 22 d'october 2023. Sin ina surfatscha da var
156 821 meters quadrat duain vegnir installads circa 25 200 moduls solars ch'èn montads sin subconstrucziuns e che cuntanschan ina
prestaziun totala da var 10,8 megawattpeak.
L'implant
è sutdividì en differents secturs ch'èn accessibels tras indrizs tecnics
specifics sco staziuns da transfurmaziun e staziuns da cumond. Grazia la
situaziun geografica e grazia a l'infrastructura turistica ch'è gia avant maun,
inclusiv las telefericas e las vias da viandar, è il lieu da staziunament bain
accessibel. La cuntanschibladad logistica e la colliaziun cun la rait electrica
existan gia.
![Madrisa Solar](/DE/Medien/Mitteilungen/MMStaka/2024/PublishingImages/Madrisa_Solar_2__w_1200__h_0.png)
© Fanzun/Repower
La Regenza conceda la permissiun per la construcziun d'in implant fotovoltaic grond tras la Madrisa Solar SA en il Partenz. I sa tracta dal project «Madrisa» en la vischnanca da Claustra.
Augmentar la segirezza per las utilisadras ed ils utilisaders da la via da Calanca
Il project da protecziun cunter crudadas da
crappa «SSV allontanament dal grip Revetell» da l'Uffizi da construcziun bassa
vegn approvà da la Regenza. Per realisar il project che custa totalmain
800 000 francs, conceda ella ultra da quai contribuziuns finanzialas
tenor la Lescha chantunala davart il guaud (maximalmain
320 000 francs) e tenor la Cunvegna da program NGF cun la
Confederaziun en il sectur «Ovras da protecziun e basas davart ils privels»
(maximalmain 280 000 francs).
Il
project qua avant maun «SSV allontanament dal grip Revetell» ha l'intent
d'augmentar la segirezza per las utilisadras ed ils utilisaders da la via da
Calanca. Ils ultims decennis è la via chantunala vegnida sutterrada e per part
donnegiada fermamain tras numerusas crudadas da grips e da blocs. Il project
prevesa da proteger adequatamain cunter crudadas da crappa e cunter bovas il
traject da via tranter «Ponte ad arco sulla Calancasca» e Buseno / «Molina
d'Fora» sut il pe da las paraids da grippa «Revetell» e «Crap Maria» cun
allontanar tschintg pachets da crappa durant ils proxims onns.
![SSV Felsabtrag Revetell](/DE/Medien/Mitteilungen/MMStaka/2024/PublishingImages/Foto%20SSV%20Felsabtrag%20Revetell__w_1200__h_0.jpg)
Il project da protecziun cunter crudadas da crappa «SSV allontanament dal grip Revetell» da l'Uffizi da construcziun bassa vegn approvà da la Regenza.
Ils Servetschs psichiatrics dal Grischun sa participeschan ad ina nova societad d'aczias per il provediment psichiatric-psicoterapeutic en il chantun Glaruna
La Regenza approvescha la participaziun dals
Servetschs psichiatrics dal Grischun (PDGR) a la nova societad d'aczias
Servetschs psichiatrics da Glaruna (PDGL) per in terz respectivamain cun ina
part al chapital d'aczias da 100 000 francs. Questa participaziun n'ha
naginas consequenzas finanzialas per las finanzas chantunalas.
Actualmain
vegn garantì il provediment psichiatric-psicoterapeutic en il chantun Glaruna
da l'Ospital chantunal da Glaruna (KSGL), da la fundaziun Posts da
cussegliaziun e da terapia Glaruna/Post da cussegliaziun e da terapia
Sonnenhügel (BTG/bts) e dals Servetschs psichiatrics dal Grischun (PDGR). Cun
la nova societad d'aczias vuless il chantun Glaruna integrar en il futur las
purschidas vertentas da las trais organisaziuns per satisfar a la dumonda
creschenta d'ina tgira psichiatrica-psicoterapeutica, per cuntanscher in grad
da cumplexitad pli aut dals cas sco er per serrar las largias en il
provediment. Las trais organisaziuns vegnan ad esser participadas a la societad
d'aczias cuminaivla cun parts egualas da mintgamai 100 000 francs
.
Die Regierung stimmt der Beteiligung der Psychiatrischen Dienste Graubünden (PDGR) an der neuen Aktiengesellschaft Psychiatrische Dienste Glarus (PDGL) zu einem Drittel respektive mit einem anteiligen Aktienkapital von 100 000 Franken zu.
Projects da votaziun dals 24 da november 2024
La Regenza ha prendì enconuschientscha dal fatg, ch'ils suandants
projects federals vegnan suttamess a la votaziun dal pievel dumengia, ils 24 da november 2024:
- Conclus federal dals 29 da settember 2023 davart il pass da cumplettaziun 2023 da las vias naziunalas;
- Midada dals 29 da settember 2023 dal Dretg d'obligaziuns (Dretg da locaziun: sutlocaziun);
- Midada dals 29 da settember 2023 dal Dretg d'obligaziuns (Dretg da locaziun: disditga pervia d'in agen basegn);
- Midada dals 22 da december 2023 da la Lescha federala davart l'assicuranza da malsauns (LAMal) (finanziaziun unitara da las prestaziuns).
Sin plaun chantunal n'èn previs nagins projects da votaziun ils 24 da november 2024.
Sin plaun chantunal n'èn previs nagins projects da votaziun ils 24 da november 2024.