Cun in sistem d'impuls en la Lescha davart la protecziun civila dal chantun Grischun vul la Regenza en l'avegnir chattar dapli persunal da cader per la protecziun civila ed uschia franar la reducziun dal dumber d'appartegnents da la protecziun civila. En la Lescha davart la protecziun da la populaziun en il chantun Grischun duai ultra da quai da nov vegnir francada explicitamain er la pussaivladad da stabs directivs regiunals. Quai duai suttastritgar l'impurtanza da la collavuraziun intercommunala en cas da catastrofas. La consultaziun per las revisiuns parzialas da las duas leschas è averta.

Il 1. da schaner 2021 è entrada en vigur la Lescha federala davart la protecziun da la populaziun e davart la protecziun civila. En il Grischun fiss per consequenza il dumber d'appartegnents da la protecziun civila (AdPC) sa reducì massivamain, sch'ins n'avess betg prendì cuntramesiras correspundentas ils ultims onns, sco per exempel la prolungaziun da l'obligaziun da far servetsch da protecziun civila. Plinavant duai ussa in sistem d'impuls garantir ch'ins possia recrutar er en l'avegnir avunda persunas da cader per la protecziun civila. Per indemnisar la lavur administrativa en connex cun las acziuns a favur da la cuminanza (AfC) vegnan las chaschunadras ed ils chaschunaders dals custs respectivamain las petentas ed ils petents (organisaturas ed organisaturs) a stuair surpigliar en l'avegnir tut ils custs.

Per finanziar ils locals da protecziun publics duai ultra da quai vegnir introducida da nov ina contribuziun substitutiva che sto vegnir pajada er, sch'in local da protecziun potenzialmain utilisabel vegn abolì a favur da las proprietarias e dals proprietaris. Dal rest vegni desistì d'ina graduaziun tenor grondezza dal local da protecziun, ed i vegn introducida ina taxa unitara.

Las experientschas dals ultims onns vegnan integradas en la revisiun parziala da la Lescha davart la protecziun da la populaziun
En connex cun la superaziun da catastrofas e situaziuns d'urgenza han ins ils ultims onns pudì rimnar experientschas impurtantas per ils stabs directivs communals e per il Stab directiv chantunal. Questas experientschas vegnan ussa integradas en la revisiun parziala da la Lescha davart la protecziun da la populaziun en il chantun Grischun.

Er en l'avegnir duain ils stabs directivs communals ed il Stab directiv chantunal pudair dumagnar mintga catastrofa e situaziun d'urgenza immediatamain ed en moda nuncumplitgada. En la Lescha davart la protecziun da la populaziun en il chantun Grischun duai da nov vegnir francada explicitamain la pussaivladad d'in stab directiv regiunal. Quant impurtanta che la collavuraziun tranter las vischnancas è en in cas da catastrofa, è sa mussà questa stad a chaschun da las malauras en il Mesauc, nua ch'in stab directiv regiunal ha superà la situaziun d'urgenza. Er en l'avegnir vegn la Polizia chantunala ad esser preschenta al lieu da donn sco emprima partenaria da la protecziun da la populaziun. Ella vegn dentant a surpigliar la direcziun en situaziuns extraordinarias mo en il num dal Stab directiv chantunal, fin che tal surpiglia questa funcziun.

Ils documents da consultaziun èn ussa disponibels
La consultaziun dura dals 21 d'avust 2024 fin ils 21 da november 2024. Ils documents respectivs èn disponibels sin la pagina d'internet dal chantun Grischun. Ultra da quai pon els vegnir empustads per telefon (tel. +41 81 257 25 13) tar il Departament da giustia, segirezza e sanadad.

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, tel. +41 79 629 00 85 (cuntanschibel da las 13.00 fin las 14.00), e‑mail Peter.Peyer@djsg.gr.ch

Responsabladad: Regenza