La Regenza ha approvà la reparaziun d'ina punt a Mesauc, in project da correcziun da las auas en Lumnezia ed ina protecziun cunter crudadas da crappa a Brusio. Ultra da quai ha ella concedì ina contribuziun chantunala per ina nova plazza da ballape da pastget artifizial a Glion.
Approvà la reparaziun da la punt San Rocco
La Regenza ha approvà il project d'exposiziun per la correcziun da la via d'Andergia sin il traject da la punt San Rocco en la vischnanca da Mesauc.
La punt San Rocco è vegnida construida gia l'onn 1771 sco part da la via d'Andergia, che tutga tar la rait chantunala da vias da colliaziun. Cun ina lunghezza da circa 41 meters traversa la punt il flum Moesa e funghescha sco colliaziun tranter il center da la vischnanca da Mesauc e las fracziuns Logiano, Deira, Darba ed Andergia. La via ha actualmain ina ladezza utilisabla da sulettamain 4,2 meters, uschia che la punt è charrabla mo sin in vial. Perquai che la platta dal vial existenta è en in nausch stadi e cunquai che las lavurs da reparaziun fissan sproporziunadas, sto quella vegnir remplazzada. En il rom dal project duai la veglia platta da betun armà vegnir allontanada fin a la structura purtanta da crappa natirala. La nova platta dal vial vegn construida en betun ed il profil traversal da la via vegn schlargià a 4,7 meters. La construcziun purtanta existenta duai percunter vegnir mantegnida e reparada localmain. Ultra da quai che la construcziun da la punt vegn rinforzada, vegni er renovà la drenascha da la via, ils conducts d'ovra e la signalisaziun. Per traversar il flum durant las lavurs da construcziun è previsa ina punt auxiliara provisorica. Ils custs totals importan var 2,9 milliuns francs.
![Sicht über die Brücke](/DE/Medien/Mitteilungen/MMStaka/2024/PublishingImages/Foto%2001%20Brücke%20San%20Rocco__w_425__h_0.JPG)
Approvà in project da drenascha per la via da la Lumnezia
La Regenza ha approvà in project da correcziun da las auas per la via da la Lumnezia en la vischnanca da Lumnezia.
Ina da las pli activas zonas da sbuvada en Lumnezia sa chatta en il territori Uresa tranter Vignogn e Lumbrein. La via da la Lumnezia traversa questa zona da sbuvada. La stabilitad da la via è per consequenza periclitada da vegl ennà. Emprimas activitads da drenascha hai perquai dà gia l'onn 1902. Blers dals indrizs da drenascha existents èn ussa donnegiads ed han cuntanschì la fin da lur funcziunalitad. Ina renovaziun totala cun in'optimaziun respectiva dal sistem è perquai inevitabla. Il sistem da drenascha d'enfin ussa duai vegnir remplazzà per gronda part tras deflussiuns avertas. Grazia a questas deflussiuns avertas èsi pussaivel da reducir il privel da donns che resultan pervia da moviments dal terren. Plinavant vegn uschia simplifitgada la controlla en l'avegnir. Ils conducts da drenascha ch'eran fin ussa cumponentas da la via da colliaziun, vegnan exclus da la rait da vias chantunalas suenter la terminaziun dal project e cedids a la vischnanca da Lumnezia sco proprietad e per il mantegniment.
Il project ademplescha las premissas per vegnir recepì en la cunvegna da program da la NGF en il sectur «Ovras da protecziun cunter l'aua». Als custs totals da 2,9 milliuns francs vegn pajada ina contribuziun federala per la correcziun da las auas da maximalmain 1,015 milliuns francs.
![Schacht](/DE/Medien/Mitteilungen/MMStaka/2024/PublishingImages/Foto%2002%20Lugnezerstrasse%20Verbauung%20Val%20d%27Uresa__w_425__h_0.jpg)
La Regenza ha approvà in project da correcziun da las auas per la via da
la Lumnezia en la vischnanca da Lumnezia.
Glisch verda per in project cunter crudadas da crappa per proteger la plazza da sport da Campascio a Brusio
La Regenza ha approvà il project «SSV Vallo Casai, Brusio» da la vischnanca da Brusio ed ha concedì contribuziuns als custs tenor la Lescha chantunala davart il guaud e tenor la cunvegna da program da la NGF cun la Confederaziun en il sectur «Ovras da protecziun e basas davart ils privels». Als custs totals dad 1,245 milliuns francs per quest project ha ella concedì ina contribuziun chantunala da maximalmain 435 750 francs e disponì ina contribuziun federala da maximalmain 435 750 francs.
Sper la plazza da sport da Campascio a Brusio sa chatta, da la vart da la muntogna, in rempar da protecziun cunter crudadas da crappa. Quest rempar è var 3,5 meters aut e 155 meters lung ed è vegnì construì da la vischnanca da Brusio l'onn 1999. Grazia al rempar ha la vischnanca pudì porscher a la plazza da ballape, ch'existiva gia quella giada, ina meglra protecziun cunter crappa che croda giu da las strivlas da grip ch'èn situadas survart. Il medem mument han ins er pudì realisar ina nova pista dad 80 meters ed ina plazza da sport generala. L'avust 2020 è la plazza da ballape vegnida tutgada d'in bloc dad 8 fin 10 meters cubic, che ha sfratgà ina crenna da var 1,5 meters autezza tras la curuna dal rempar existent e ch'è arrivà fin sin la plazza da ballape. Var 20 ulteriurs blocs d'in volumen da 0,5 fin 10 meters cubic èn arrivads fin al pe da la costa. La gronda part dals blocs è vegnida franada dal rempar existent. Al nord ed al sid dal rempar èn dus blocs dentant rudlads sper il rempar ora. Il bloc ch'è rudlà al sid sper il rempar vi, ha donnegià la chasa da club. Il project actual prevesa da remplazzar il rempar existent. Quest nov rempar meglierà duai avair ina lunghezza da 170 meters, in'autezza da 5 fin 7 meters e – da la vart da la muntogna – in spazi da 5 meters per crudadas. L'ovra da protecziun planisada duai proteger ils implants da sport Casai sco er l'edifizi d'industria e da mastergn cunfinant cunter crudadas da crappa e da blocca che han ina perioda da repetiziun da fin 100 onns.
![Steinschlag](/DE/Medien/Mitteilungen/MMStaka/2024/PublishingImages/Foto_SSV_ValloCasai_2__w_425__h_0.jpg)
La Regenza ha approvà il project «SSV Vallo Casai, Brusio» da la
vischnanca da Brusio ed ha concedì contribuziuns als custs tenor la Lescha
chantunala davart il guaud e tenor la cunvegna da program da la NGF cun la
Confederaziun en il sectur «Ovras da protecziun e basas davart ils privels».
Contribuziun chantunala per ina nova plazza da ballape da pastget artifizial a Glion
Per construir ina plazza da ballape da pastget artifizial en il territori Fontanivas a Glion ha la Regenza concedì a la US Schluein Glion duas contribuziuns chantunalas da totalmain 315 600 francs. D'ina vart ha ella concedì ina contribuziun da maximalmain 152 000 francs en il rom dal Concept per implants da sport d'impurtanza chantunala (CISIC), da l'autra vart maximalmain 163 600 francs or da la finanziaziun speziala Sport. Ils custs subvenziunabels dal project importan tut en tut 1,72 milliuns francs.
La US Schluein Glion posseda l'arena da ballape Crap Gries Isla a Schluein cun ina tribuna per 700 aspectaturas ed aspectaturs. Perquai che l'uniun crescha ad in crescher, èsi previsibel che las infrastructuras a Schluein sco er la plazza da ballape inclusiv la plazza da trenament Fontanivas a Glion na vegnan gia prest betg pli a bastar per ils trenaments e per ils gieus. Perquai ha il club da ballape l'intenziun da construir ina plazza da ballape da pastget artifizial en il territori Fontanivas a Glion per remplazzar la plazza da ballape existenta. Il project duai vegnir realisà tranter l'atun 2024 e la primavaira 2025. La purschida è impurtanta cunzunt durant ils mais d'enviern, per ch'i saja pussaivel da trenar durant l'entir onn en Surselva.
En il rom dal CISIC promova il chantun la construcziun e la renovaziun da stabiliments da sport d'impurtanza naziunala, chantunala e regiunala. Tras la contribuziun chantunala vegnan las plazzas da ballape Crap Gries a Schluein e Fontanivas a Glion integradas ensemen en il catalog dal CISIC, quai sco implant da ballape d’impurtanza regiunala. Questa inscripziun en il catalog premetta ch'i vegnian ademplids differents criteris e differentas premissas.
Fotografia sanestra: © Vischnanca dad Ilanz/Glion, Fotografia dretga: © Michael Spescha, Ilanz/Glion
Per construir ina plazza da ballape da pastget artifizial en il
territori Fontanivas a Glion ha la Regenza concedì a la US Schluein Glion duas
contribuziuns chantunalas da totalmain 315 600 francs.