Dals 2 fin ils 8 da schaner 2025 vegn ad avair lieu a Lenk en il Simmental il 82avel champ da skis per giuvenils (JUSKILA). Sco champ da sport da naiv il pli grond da la Svizra porscha il JUSKILA a 600 giuvenils da l'entira Svizra e dal Principadi da Liechtenstein in'occasiun unica da giudair in'emna plain activitads sportivas ed eveniments nunemblidaivels en la naiv. Per l'ediziun 2025 ha Swiss-Ski tschernì il chantun Grischun sco chantun da patrunadi.

Dapi l'onn 1941 pussibilitescha Swiss-Ski mintg'onn a 300 mats e 300 mattas da 13 e 14 onns da far novas amicizias, da surmuntar barrieras culturalas e linguisticas e da scuvrir l'entusiassem per il sport da naiv. Il JUSKILA porscha 500 plazs per ski alpin e 100 plazs per snowboard. Ultra da quai pon ils giuvenils experimentar er disciplinas da sport cumplementaras sco passlung e snowblades. L'inclusiun è gronda: Er giuvenils cun impediments corporals u spiertals pon sa participar al champ, quai grazia a l'Associaziun svizra dals paraplegichers e PluSport. Var 150 manadras e manaders en uffizi d'onur procuran avant, durant e suenter il champ per in andament senza incaps.

Willkommen – Bainvegni – Benvenuti: Il Grischun sco chantun da patrunadi
Per il JUSKILA 2025 surpiglia il chantun Grischun la rolla da patrunadi. Uschia profitescha il Grischun da vastas mesiras da communicaziun ed ha la ferma garanzia, che 60 giuvenils dal chantun pon sa participar al divertiment da skis, quai per il pretsch da 120 francs per persuna e per in'emna. Cun quest engaschament vul il Grischun d'ina vart suttastritgar sia cumpetenza per il sport da naiv ed accentuar da l'autra vart la trilinguitad dal chantun. «Nus planisain quizs divertents e videos umoristics per sensibilisar ils giuvenils a moda ludica per nossas trais linguas chantunalas», declera Thierry Jeanneret, manader da la partiziun Sport tar l'Uffizi per la scola populara ed il sport. «E forsa svegliain nus tar els il gust dad era passentar ina giada lur vacanzas da skis en il Grischun.»

Cun ina tradiziun da passa 80 onns è il JUSKILA ina part indispensabla da la cultura dal sport da naiv en Svizra.

Annunzias fin ils 30 da settember 2024
L'annunzia per il JUSKILA 2025 è pussaivla fin la fin da settember 2024. Persunas interessadas pon sa registrar sin la pagina d'internet juskila.ch. Silsuenter vegnan definidas las 600 participantas e participants.

Agiunta:

flyer d'annunzia

Infurmaziuns:

• Thierry Jeannert, manader da la partiziun Sport, Uffizi per la scola populara ed il sport, tel. +41 81 257 27 51 (cuntanschibel da las 09.00 fin las 10.00), e‑mail Thierry.Jeanneret@avs.gr.ch
• Sarah von Arx, responsabla per il project JUSKILA, Swiss-Ski, tel. +41 31 950 62 23,  e‑mail juskila@swiss-ski.ch