Dapi il zercladur 2023 vegn elavurà in ulteriur program d'aglomeraziun per las regiuns Plaun, Plessur e Landquart. Il sboz è avant maun e vegn ussa dà en consultaziun a las vischnancas ed a las regiuns pertutgadas sco er als posts da servetsch chantunals respectivs.
Las consequenzas dal grond volumen da traffic e la viva activitad da construcziun vegnan a restar er en l'avegnir sfidas pretensiusas per la planisaziun. Il program d'aglomeraziun Cuira furnescha perquai ina strategia generala per in svilup coordinà dals abitadis e dal traffic sco er numerusas mesiras singulas, per exempel per il traffic da peduns e da velos, per ina concepziun da las vias che sa cumporta cun ils abitadis, per il traffic public, per il traffic individual motorisà e per ils accents en il svilup dals abitadis vers l'intern.
Ulteriur svilup dal program d'aglomeraziun actual
Il program sa basa sin la 4. generaziun da program existenta. Er vinavant èsi previs d'optimar las staziuns da viafier sco lieus da midada, da concepir las vias uschia, ch'ellas sa cumportan cun ils abitadis, e da concretisar ils hotspots durabels pertutgant il svilup dals abitadis vers l'intern. I dat dentant er novs elements, per exempel ponderaziuns pli detagliadas davart il traffic da pedunas e peduns ed in meglier resguard dals spazis libers e da las zonas verdas en ils abitadis. Sco emprim va il program ussa en consultaziun tar las vischnancas pertutgadas e tar ils posts da servetsch respectivs. A partir dal schaner 2025 po la populaziun alura s'exprimer durant 30 dis davart il sboz dal program.
La Confederaziun sa participescha a la finanziaziun da mesiras per meglierar l'infrastructura da traffic en las citads ed en las aglomeraziuns. Il program d'aglomeraziun da la 5. generaziun per Cuira vegn perquai inoltrà a la Confederaziun per l'examinaziun, quai cun dumandar a medem temp ina cofinanziaziun. Il termin per l'inoltraziun a la Confederaziun dura fin ils 30 da zercladur 2025. La finala decida il Parlament federal definitivamain davart la finanziaziun da tut ils programs d'aglomeraziun.
Links:
Infurmaziuns:
Boris Spycher, manader da project, Uffizi per il svilup dal territori, tel. +41 81 257 23 06 (cuntanschibel da las 09.00 fin las 11.00), e‑mail Boris.Spycher@are.gr.ch
Responsabladad: Uffizi per il svilup dal territori