La Regenza grischuna ha nominà Daniel Bühler sco nov manader da l'Uffizi chantunal per la valitaziun d'immobiglias. El surpiglia questa funcziun il 1. da schaner 2025.

La Regenza ha elegì Daniel Bühler sco nov manader da l'Uffizi per la valitaziun d'immobiglias dal chantun Grischun. Daniel Bühler è burgais da Val Stussavgia ed abitescha a Ragaz Bogn. El succeda a Gion-Reto Hassler che mida en l'economia privata.

Daniel Bühler ha rimnà durant blers onns experientscha en l'administraziun publica ed en la politica. Dapi il 2013 è el president communal da Ragaz Bogn. Fin il zercladur da quest onn ha el er fatg part durant 12 onns dal Cussegl grond dal chantun Son Gagl. Daniel Bühler ha la patenta grischuna d'administratur dal register funsil, in diplom en economia da manaschi da l'actuala Scola auta spezialisada dal Grischun sco er furmaziuns supplementaras en direcziun e management.

L'Uffizi per la valitaziun d'immobiglias è responsabel per valitar uffizialmain ils bains immobigliars e las immobiglias en il chantun Grischun. Cun bunamain 60 collavuraturas e collavuraturs e cun ils sis biros da valitaziun a Cuira, Tavau, Glion, Tusaun, Samedan e Scuol realisescha l'uffizi fin 20 000 valitaziuns per onn.

Fotografia agiuntada:

Infurmaziuns:

Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 12.00 fin las 13.30), e‑mail Martin.Buehler@dfg.gr.ch