Tge basegns e tge sfidas han ils umens oz en il Grischun? Tge èn lur rollas en la societad ed en connex cun l'egualitad? Gievgia, ils 3 d'october 2024, envida il Post da stab per l'egualitad da las schanzas per dunnas ed umens en la Biblioteca da la citad da Cuira per discutar questas dumondas. Differents umens raquintan en films curts e sin il podium davart lur experientschas ed aspectativas.

Las rollas da las schlattainas sa midan. Ils ultims decennis han las dunnas cumbattì cun success per ina repartiziun pli gista da las rollas, per libertads e per dapli pussanza. Ils umens sustegnan per part quest moviment, per part spetgan els, per part èn els sceptics u negativs.

Chatschader, magister da skis, scheni universal – datti maletgs dad umens tipics grischuns? Co sa midan els? Tge vulan e dovran ils umens ozendi en il Grischun? L'occurrenza «Esser um en il Grischun. Identitad, tradiziun, midada» porscha gievgia, ils 3 d'october 2024, da las 19.00 fin las 20.30 en la Biblioteca da la citad da Cuira in spazi per reflectar e per discutar la vasta paletta da pussaivladads dad esser um en il Grischun.

Esser mirveglius e metter en dumonda las rollas
Suenter curts purtrets filmics da differents umens discutan Martin Bühler, schef dal Departament da finanzas e vischnancas, Tobias Oberli, expert da cumpatibilitad tar il post spezialisà UND, Cla Mosca, coach dad umens, e Sasha Rosenstein, suprastant da Die Feministen, sin il podium davart ideas da la masculinitad, aspectativas, basegns e sfidas. Il discurs vegn moderà da Nicolas Zogg, coach, expert d'ambient ed anteriur collavuratur dal Post da stab per l'egualitad da las schanzas per dunnas ed umens dal Grischun (Post d'egualitad).

Cun quest tema vul il Post d'egualitad metter in segn per l'avertadad. «L'egualitad n'è betg mo in giavisch da las dunnas, er ad umens ed a persunas diversas avra ella bleras perspectivas e pussaivladads da sa sviluppar tenor ils agens interess e talents», declera Barbara Wülser, la manadra dal Post d'egualitad. Nicolas Zogg che ha gidà a concepir l'occurrenza, giavischa: «Nus lain scuvrir cun mirveglias las differentas rollas ch'ils umens pon surpigliar.» L'occurrenza è – tenor Zogg – ina contribuziun per render conscientas las rollas tradiziunalas, per metter en dumonda ed adattar u acceptar ellas u per sa deliberar dad ellas.

Ulteriuras infurmaziuns ed annunzia
Per motivs organisatorics As supplitgain nus d'As annunziar. Ulteriuras infurmaziuns davart l'occurrenza «Esser um en il Grischun. Identitad, tradiziun, midada» chattais Vus sin la pagina d'internet dal Post d'egualitad.

Agiunta:

Flyer

Infurmaziuns:

Barbara Wülser, manadra dal Post da stab per l'egualitad da las schanzas per dunnas ed umens, tel.+41 81 257 35 71 (cuntanschibla da las 09.00 fin las 12.00), e‑mail Barbara.Wuelser@stagl.gr.ch