La Regenza ha prendì posiziun tar il project da consultaziun dal Departament federal per ambient, traffic, energia e communicaziun concernent la midada da l'Ordinaziun davart la planisaziun dal territori per realisar la LPT 2.
La Regenza refusa il project da la OPT e pretenda ina reelavuraziun detagliada
La Regenza ha prendì posiziun tar in project da consultaziun dal Departament federal per ambient, traffic, energia e communicaziun (DATEC) concernent la midada da l'Ordinaziun davart la planisaziun dal territori (OPT). Il project cuntegna las disposiziuns executivas per la segunda etappa da la revisiun parziala da la Lescha davart la planisaziun dal territori (LPT 2). Questas disposiziuns pertutgan il construir ordaifer las zonas da construcziun e per part er la Lescha federala davart in provediment d'electricitad segir cun energias regenerablas. Il tema principal èn las disposiziuns davart la stabilisaziun da l'effectiv d'edifizis e da las surfatschas sigilladas ordaifer las zonas da construcziun. En la OPT vegnan plinavant fatgas adattaziuns pertutgant l'idea territoriala, pertutgant la precedenza da l'agricultura en la zona d'agricultura, pertutgant il construir illegalmain sco er adattaziuns per meglierar las premissas per utilisar las energias regenerablas.
En sia resposta suonda la Regenza cumplainamain la posiziun da la Conferenza da las regenzas dals chantuns alpins (CRCA). Supplementarmain accentuescha la Regenza ils puncts ch'èn centrals per ella. Uschia duai la Confederaziun sa participar essenzialmain a la finanziaziun da la premia da demoliziun e sustegnair qua tras ils chantuns. Plinavant è la Regenza da l'avis, che la valur essenziala per cuntanscher las finamiras da stabilisaziun, saja cun 101 pertschient memia bassa. Ella pretenda pia in auzament sin 102 pertschient. Ultra da quai fa ella endament a la Confederaziun, ch'ella observia las basas deliberadas dal parlament, numnadamain che la finamira da stabilisaziun concernent las sigilladas valia mo per zonas d'agricultura che vegnan cultivadas l'entir onn, e che l'excepziun per activitads turisticas na fetschia betg mo effect en territoris che vegnan principalmain utilisads turisticamain. Plinavant dumonda ella d'exceptar da la finamira da stabilisaziun er las sigilladas dal terren per implants indispensabels sco vias da velos, access a reservuars d'aua da stizzar fieu e d'aua da baiver, averturas da zonas da construcziun e.u.v. La finala accentuescha ella, che la retschertga da datas duaja vegnir limitada sin quai ch'è il pli necessari per cuntanscher la finamira da stabilisaziun, quai cun l'intent da pudair minimar tant sco pussaivel la lavur administrativa supplementara, ch'è en mintga cas gia considerabla.
La Regenza ha prendì posiziun tar in project da consultaziun dal
Departament federal per ambient, traffic, energia e communicaziun (DATEC)
concernent la midada da l'Ordinaziun davart la planisaziun dal territori (OPT).
