La Regenza ha deliberà la missiva tar la revisiun parziala da la Lescha davart las scolas popularas dal chantun Grischun per mauns dal Cussegl grond. Suenter la revisiun totala da la Lescha da scola l'onn 2012, vegn ella ussa adattada a las relaziuns actualas. Il Cussegl grond vegn a tractar questa fatschenta durant la sessiun da december 2024.
La Lescha davart las scolas popularas dal chantun Grischun e l'ordinaziun respectiva reglan ils fatgs da la scola populara. L'ultima giada èn quests relaschs vegnids reelavurads fundamentalmain ed adattads als basegns da la societad ed a las cundiziuns generalas l'onn 2012. La revisiun totala da la Lescha da scola da l'onn 2012 è sa cumprovada en la pratica. Sin fundament da svilups socials, tecnologics e da la politica da furmaziun èn las pretensiuns envers la scola sa midadas ils ultims 12 onns. Cun la revisiun parziala qua avant maun vul la Regenza prender a mauns las adattaziuns necessarias en differents secturs da la scola populara.
Incumbensas parlamentaras
Cun realisar las incumbensas dals deputads Claus, Michael e Tenchio vegnan relaschadas u adattadas las basas legalas per la reintroducziun da la classa d'introducziun, per la cumpetenza e l'egualitad da las furmas da scolaziun en il sectur simpel da la pedagogia speziala sco er per la participaziun finanziala dal chantun a champs da classa, emnas da project ed excursiuns. Ultra da quai vegn realisada l'incumbensa Caluori en il sectur da la scola populara ed uschia creada ina basa legala per manar scolas en ospitals.
Ulteriuras adattaziuns
En spezial èn las tariffas da la salarisaziun minimala dal stgalim da scolina vegnidas examinadas ed adattadas al stgalim primar. Las tariffas da la salarisaziun minimala vegnan adattadas a la media da la Svizra Orientala. Questas adattaziuns vegnan ad avair consequenzas correspundentas per ils preventivs dals purtaders da scola respectivamain da las vischnancas politicas. Igl è ultra da quai previs d'introducir in obligatori d'ir a scolina. Plinavant vegn il dretg d'audiziun da las scolaras e dals scolars francà en la lescha, e las cumpetenzas da la Regenza da conceder autorisaziuns d'instruir vegnan extendidas. En il futur sa participescha il chantun – tras in augment da la pauschala per la scola regulara – als custs supplementars da las vischnancas che na vegnan betg indemnisads cun contribuziuns chantunalas specificas. Quai pertutga en spezial l'augment da la salarisaziun minimala da las persunas d'instrucziun, la distgargia da vegliadetgna er en cas d'engaschaments a temp parzial, las tariffas per las tecnologias d'infurmaziun e da communicaziun (ICT) sco er la reducziun dal pensum d'instrucziun per las persunas d'instrucziun da classa sin il stgalim da scolina.
Agiunta:
Missiva tar la revisiun parziala da la Lescha davart las scolas popularas dal chantun Grischun
Infurmaziuns:
President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 14.00 fin las 15.00), e‑mail Jondomenic.Parolini@ekud.gr.ch
Responsabladad: Regenza