Per distgargiar Sta. Maria en Val Müstair dal traffic vegn instradà il proxim pass da procedura. Ils 30 da settember 2024 cumenza l'exposiziun publica da cooperaziun per adattar il Plan directiv.

Il center istoric dal vitg da Sta. Maria è exponì dapi onns ad ina gronda quantitad da traffic. L'augment dal traffic da transit sin la via dal Pass dal Fuorn e la quantitad da traffic sin il Pass da l'Umbrail chaschunan regularmain impediments dal traffic e colonnas spezialmain durant ils mais da stad. Sut quest aspect exista dapi decennis il giavisch da distgargiar il lieu Sta. Maria dal traffic per meglierar la segirezza en il vitg, per augmentar la qualitad da viver per las abitantas ed ils abitants e per ils giasts sco er per mantegnair e per augmentar la valur dal center dal vitg ch'è sut protecziun naziunala. Gia dapi la fin dals onns 1990 èn vegnidas sviluppadas differentas soluziuns per quest intent. Per differents motivs n'han fin ussa dentant anc pudì vegnir realisadas naginas mesiras da distgargia.

Adattaziun en il Plan directiv è necessaria
Projects da vias pli gronds, sco sviaments, valan tenor la Lescha federala davart la planisaziun dal territori sco projects cun consequenzas considerablas per il territori e per l'ambient e ston perquai vegnir determinads en il Plan directiv chantunal. Sco basa per quai han ins fatg dapi l'onn 2020 – cun integrar expertas ed experts da differents secturs spezials – in'evaluaziun cumplessiva da variantas per distgargiar Sta. Maria dal traffic. La meglra varianta ch'è vegnida sviluppada là, prevesa da construir ina via da sviament a l'ur nord da l'abitadi, che sutpassa il quartier da Paclera sco er l'aual da Muranzina en in tunnel da var 600 meters lunghezza. Quest concept da distgargia furma la basa per la determinaziun previsa ussa en il Plan directiv.

Cun la planisaziun directiva vegn segirà territorialmain il corridor da sviament necessari, e quai en moda lianta per las autoritads, e vegnan accordads ils interess da la Confederaziun e dal chantun. Ultra da quai vegnan fixadas ulteriuras mesiras per las planisaziuns suandantas, che gidan tranter auter a pussibilitar ina concepziun optimala ed ina integraziun en la cuntrada dal project sco er a meglierar la qualitad d'abitar e da dimora entaifer il center dal vitg.

Exposiziun publica durant 30 dis
L'adattaziun dal Plan directiv vegn exponida publicamain durant 30 dis, e quai a partir dals 30 da settember 2024. Durant quest temp han tut las persunas interessadas la pussaivladad d'inoltrar en scrit objecziuns e propostas.

Il project sa chatta gia en l'examinaziun preliminara tar la Confederaziun. Sin basa dals resultats da l'exposiziun publica e da l'examinaziun preliminara da la Confederaziun vegn il Plan directiv alura elavurà vinavant. Il Plan directiv vegn concludì da la Regenza grischuna ed approvà dal Cussegl federal.

Agiunta:

Sviament da Sta. Maria, varianta «Sviament nord» (versiun: favrer 2023)

Infurmaziuns:

Richard Atzmüller, manader da l'Uffizi per il svilup dal territori, tel +41 81 257 23 21 (cuntanschibel da las 10.30 fin las 11.30), e‑mail Richard.Atzmueller@are.gr.ch

Responsabladad: Uffizi per il svilup dal territori