L'onn 2026 vegn il chantun Grischun ad esser chantun ospitant al Sechseläuten da Turitg. La Regenza grischuna ha acceptà ina invitaziun correspundenta dal Comité central da las zunfts da Turitg (Zentralkomitee der Zünfte Zürichs, ZZZ). Il Sechseläuten da Turitg ha lieu dals 17 fin ils 20 d'avrigl 2026.

Per la segunda giada dastga il Grischun sa preschentar sco chantun ospitant a questa festa da primavaira en la citad da Turitg. Igl è in grond plaschair da puspè participar suenter 20 onns sco chantun ospitant.

La preschentaziun da l'onn 2004 sut il motto «Il Grischun metta fieu en pigna» è anc adina en buna memoria. Quella giada n'han ins betg mo preschentà blers bains culturals ed offrì spezialitads culinaricas, mabain schizunt concurrenzà il Böögg cun arder l'Hom Strom da Scuol. Sin il Lindenhof ha il chantun installà durant 4 dis sia atgna «Chasa da zunft Capricorn».

Signal da partenza per l'organisaziun
Il Departament d'economia publica e fatgs socials vegn a prender per mauns las preparaziuns per la preschentaziun ospitanta 2026. Sco president dal comité d'organisaziun sa legra il cusseglier guvernativ Marcus Caduff sin la preschentaziun da 4 dis en la citad da Turitg: «Il Grischun ha bler da porscher. Il Lindenhof vegn ad esser dal tuttafatg en mauns grischuns. Ed er uschiglio vegn il Grischun a laschar enavos ses fastizs a Turitg.»

Dapi il giubileum da 700 onns Confederaziun, l'onn 1991, envida il Comité central da las zunfts da Turitg mintga onn in chantun sco giast al Sechseläuten a Turitg. Sin il Lindenhof sa preschenta il chantun ospitant durant 4 dis cun in'exposiziun, cun in program da divertiment varià e cun spezialitads culinaricas. Al cortegi dals uffants da la dumengia ed al cortegi da las zunfts che maina il glindesdi fin al fieu, participescha il giast cun in'atgna delegaziun e cun sujets tipics tradiziunals.

Infurmaziuns:

• Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel da las 10.00 fin las 12.00), e‑mail Marcus.Caduff@dvs.gr.ch
• Victor Rosser, Zentralkomitee der Zünfte Zürichs, schef da la Communicaziun, tel. +41 79 205 74 71, e‑mail kommunikation@sechselaeuten.ch