Suenter la fusiun cun Maladers l'onn 2020 e cun Haldenstein l'onn 2021 duai il 1. da schaner 2025 er la vischnanca da Tschiertschen-Praden vegnir integrada en la citad da Cuira. La radunanza communala da Tschiertschen-Praden aveva approvà la fusiun gia il zercladur. Il settember han ussa er las votantas ed ils votants da Cuira acceptà cun ina clera maioritad il contract da fusiun.
La vischnanca da Tschiertschen-Praden è vegnida furmada il 1. da schaner 2009 tras la fusiun da las duas vischnancas Praden e Tschiertschen. En la vischinanza directa èn sa constituidas pli tard las novas vischnancas da Churwalden (2010) e dad Arosa (2013). Adina puspè è la vischnanca da Tschiertschen-Praden sa fatschentada cun la dumonda da l'agen futur structural. En cas d'ina fusiun è adina vegnida favurisada la colliaziun cun la citad da Cuira.
Dapi la fusiun cun Maladers cunfinescha Cuira cun Tschiertschen-Praden. Plinavant s'orienteschan las abitantas ed ils abitants sco er l'economia da Tschiertschen-Praden pli fitg vers Cuira che vers mintga autra vischnanca vischina. Il motiv per quai è principalmain la buna colliaziun da traffic cun la citad.
Scleriments intensivs han purtà in resultat positiv
Ils 25 d'avust 2022 ha la radunanza communala da Tschiertschen-Praden discutà concretamain davart scleriments da fusiun cun la citad da Cuira. Silsuenter ha la suprastanza communala inoltrà ina dumonda correspundenta al Cussegl da la citad. Motivs per questa decisiun èn stadas, la recrutaziun da persunal per las autoritads ch'è pli e pli difficila sco er la sfida finanziala da pudair garantir a vista mesauna fin a lunga vista finanzas saunas. Il Cussegl da la citad è entrà sin la dumonda ed ina gruppa da project ha fatg ils scleriments da fusiun.
La gruppa da project ha examinà detagliadamain differentas dumondas. Particularmain las consequenzas finanzialas da la fusiun sin las finanzas da la citad da Cuira èn vegnidas simuladas en moda acribica. Las enconuschientschas èn vegnidas discutadas intensivamain tant entaifer la gruppa da project ed en las duas suprastanzas sco er cun il chantun. Suenter las occurrenzas d'infurmaziun a Tschiertschen ed en il parlament da la citad da Cuira èn ins vegnì a la persvasiun, che la fusiun saja degna da vegnir sustegnida.
A Tschiertschen-Praden ha la votaziun davart il contract da fusiun gì lieu ils 14 da zercladur 2024. Cun in'auta participaziun a la votaziun da 63,4 pertschient ha la radunanza communala approvà il contract da fusiun cun 114 cunter 21 vuschs. Ils 22 da settember 2024 ha er ina clera maioritad da var 76 pertschient da las votantas e dals votants da Cuira acceptà il contract da fusiun a l'urna.
Contribuziun da promoziun chantunala da 7,25 milliuns francs
La contribuziun da promoziun chantunala che la Regenza ha garantì per la fusiun da la citad da Cuira cun la vischnanca da Tschiertschen-Praden importa 7,25 milliuns francs. Ultra da quai vegn garantida ina gulivaziun da las grevezzas geografic-topograficas e da scola da 350 000 francs per onn, quai per la durada da 10 onns. Il Cussegl grond vegn a tractar la missiva da la Regenza en la sessiun da december. Cun questa fusiun sa reducescha il dumber da vischnancas grischunas a 100 per il 1. da schaner 2025.
La fusiun qua avant maun sto vegnir qualifitgada sco incorporaziun da Tschiertschen-Praden en la citad da Cuira. Cuira surpiglia tut las relaziuns giuridicas da la vischnanca da Tschiertschen-Praden ed il dretg municipal da Cuira mantegna sia valaivladad per la vischnanca fusiunada. Cun paucas excepziuns vegnan ils relaschs giuridics da Tschiertschen-Praden abolids, cura che la fusiun entra en vigur. Cun la fusiun s'engrondescha il dumber da 39 000 persunas che vivan a Cuira per las var 300 abitantas ed abitants da Tschiertschen-Praden.
Agiunta:
Missiva
Infurmaziuns:
- Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 05 (cuntanschibel da las 10.00 fin las 12.00), e‑mail Martin.Buehler@dfg.gr.ch
- Simon Theus, manader Projects e vicemanader da l'Uffizi da vischnancas, tel. +41 81 257 23 87 (cuntanschibel da las 8.30 fin las 10.00), e‑mail Simon.Theus@afg.gr.ch
Responsabladad: Departament da finanzas e vischnancas